‘कोशी’ आन्दोलनं सुरक्षा खतरा

येँ (नेपालभाषा टाइम्स)÷प्रदेश नम्बर १ या नां ‘कोशी प्रदेश’ तयेधुंकाः ब्वलंगु आन्दोलनया कारणं प्रदेशय् सुरक्षा चुनौती अप्वया वनाच्वंगु धासें आः संघीय सरकारं हे थुकिया समाधान यायेमाःगु खँ राजनीतिक दलतय्सं धाःगु दु ।

म्हिगः विराटनगरय् जूगु छगू ज्याझ्वलय् थीथी राजनीतिक दलया नेतातय्सं उपप्रधानमन्त्री लिसें गृहमन्त्री नारायणकाजी श्रेष्ठ समक्ष थ्व समस्या कंगु खः ।

ज्याझ्वलय् न्ववासें प्रदेशया पुलांम्ह मुख्यमन्त्री उद्धव थापां प्रदेशया नामाकरण लिपा प्रदेशन्यंकं आन्दोलन शुरु जूगु व उकियात थःपिंसं सम्बोधन यायेगु कुतः यानागु खःसां समाधान धाःसा याये मफुगु खँ कनादिल । थ्व समस्यायात आः केन्द्रं हे सम्बोधन यायेमाःगु खँ कँसें थापां प्रदेशय् आः पहिचान जक मखु धर्मया नामय् तकं मेगु समस्या ब्वलनीगु सम्भावना खने दयाच्वंगु बिचाः प्वंकादिल ।

ज्याझ्वलय् माओवादी केन्द्रया प्रदेश सचिव गणेश उप्रेतीं पहिचानया मुद्दायात राजनीतिक रुपं ज्यंकेमाः धासें कोशी प्रदेशय् आः वयाः साम्प्रदायिक चलखेल अप्वया च्वंगुलिं उकी निगरानी तयेमाःगु खँ कनादिल ।

जसपाया प्रदेश अध्यक्ष दिपक याक्खां पहिचानवादीतय्सं थःपिनि माग शान्तिपूर्ण रुपं ल्ह्वनाच्वंगु खःसां राज्यं धाःसा उमित दमन यानाच्वंगु धासें उकी आपत्ति प्वंकादिल ।

दलया नेतातय् खँयात सम्बोधन यासें गृहमन्त्री श्रेष्ठं कोशी नांया विरुद्ध आन्दोलन यायेगु अधिकार सकसिकें दु तर आन्दोलनया नामय् प्रदेशय् हे सुयातं वये–वने हे याये मदइगु व वःपिंत आक्रमण याये कथंया ज्याखँ धाःसा याये दइ मखु धयादिल । ‘कोशी प्रदेश’ धइगु नां यदि आन्दोलनकारीतय्त चित्त बुझे मजूगु खःसा मेगु नां तयेगु लागिं जनमत तयार यायेगु अधिकार उमिके दुगु खँ नं वय्कलं स्पष्ट यानादिल ।

अथे हे वय्कलं प्रदेशया नां तयेगु अधिकार प्रदेशसभायाके दुगुलिं नां हिलेगु ज्या नं अनं हे यायेमाःगु खँ नं कनादिल । मेखे प्रदेशया मुख्यमन्त्री हिक्मत कार्कीं धाःसा ‘कोशी प्रदेश’ नांया विरुद्ध जुयाच्वंगु आन्दोलनयात सत्ताया नेतृत्व यानाच्वंगु दलतय्सं हे तिबः बियाच्वंगु द्वपं बियादीगु दु । म्हिगः विराटनगरय् हे जूगु मेगु छगू ज्याझ्वलय् न्ववासें

वय्कलं उगु खँ कनादीगु खः । वय्कलं आः न्ह्यानाच्वंगु पहिचानया आन्दोलन नेकपा एमालेप्रति लक्षित जुयाच्वंगु द्वपं नं बियादीगु दु ।
पहिचानया आन्दोलनकारीतय्सं थःपिनि आन्दोलनया झ्वलय् मुख्यमन्त्री कार्की लिसें एमालेया अध्यक्ष केपी ओली व एमालेया मेमेपिं नं थीथी नेतातय्त लँय् हे अप्पां कयेकाः आक्रमण याःगु कारणं एमालें थ्व आन्दोलनयात थःपिं विरुद्ध लक्षित यानाः सत्तारुढ दलतय्सं शुरु याःगु ज्या धकाः तायेकेगु यानाच्वंगु दु ।