चीनय् नेपालं ल्ह्वन कालापानीया मुद्दा
आः छु जुइ भारतया प्रतिक्रिया ?
येँ (नेपालभाषा टाइम्स)/नेपाः व भारत दथुइ ‘विवाद’ या विषय जुयाच्वंगु कालापानीया मुद्दा प्रधानमन्त्री केपी शर्मा ओलीं म्हीग चिनियाँ राष्ट्रपति सी जिनपिनलिसे जूगु वार्ताय् ल्ह्वनादीवं उकियात कयाः थीथी कथंया प्रतिक्रिया नं शुरु जूगु दु । चिनियाँ राष्ट्रपतिया न्ह्यःने प्रम ओलीं ल्ह्वनादीगु थ्व विषय नेपालय् धाःसा तःधंगु राष्ट्रवादी मुद्दा कथं चर्चित जुयाच्वंगु दु ।
प्रम ओलीं चीन भ्रमणया इलय् चिनियाँ पक्षया न्ह्यःने कालापानीया मुद्दा ल्ह्वनेमाः धकाः नेपालय् संसदं समेत म्याण्डेट बिउगु खः । चीनय् थ्व विषयय् खँ पिहां वयेवं आः कालापानीया मुद्दा नेपाः व भारतया निगू देशीय फोरमय् जक मखुसें मेगु अन्तर्राष्ट्रिय फोरमय् समेत प्रवेश जूगु खँ धयाहःगु दु । नेपाःया कुटनीतिक ख्यलं थ्वयात आः नेपाः भारत बाहेक मेगु अन्तर्राष्ट्रिय फोरमय् समेत चर्चाया विषय जूगु खँ धाःगु दु । थुकियात नेपाःया कुटनीतिक सफलताया विषय कथं कायेमाःगु खँ नं धयाहःगु दु ।
प्रम ओलीं चीनय् ल्ह्वनादीगु कालापानीया चर्चा नेपाः जक मखु भारतीय मिडियाय् नं शुरु जूगु दु । प्रम ओलीं न्ववानादीगु खँ समाचारय् पिहां वयेवं भारतीय मिडियातय्सं नं थुकियात कयाः विशेष कथं चर्चा याना हःगु दु । भारतीय मिडियाय् वःगु चर्चा कथं नेपाःया थ्व कुतःपाखें भारत तंचाःगु बिसें नं भारतं थुकिया मेकथं थुइकाच्वंगु खनेदु ।
भारतीय मिडियाय् वःगु चर्चा कथं चीन समक्ष नेपालं थ्व मुद्दा ल्ह्वंसां चीनं उकियात पूर्ण रुपं समर्थन मयाःगु खनेदु । नेपालं क्यंगु सरोकारया लिसः बिसें चीनं थुकी नेपाःया अडानयात लिच्वः लाइकथं थःपिंसं छुं भूमिका म्हितेमखु धकाः लिसः बिउगु खः । चीनया थ्व लिसःयात भारतं ‘नेपाःया मामिलाय् चीन मौन च्वंगु’ धकाः थुइका हःगु दु । भारतय् विशेष यानाः भारतीय संस्थापन पक्षया लाइन पित बीगु मिडिया कथं चर्चित ‘टाइम्स अफ इण्डिया’ या अनलाइन संस्करणय् ‘चिनियाँ मौनता’ धकाः ब्याख्या याना हःगु दु । चीनया थ्व प्रतिक्रिया भारतया लागिं लसताया खँ खः धकाः नं उकी टिप्पणी यानातःगु दु ।
नेपालं चीनलिसे याःगु थ्व ‘कम्प्लेन’ लिपा भारतीय प्रधानमन्त्री नरेन्द्र मोदीं म्हिगः ओलीलिसे ल्हाः मिले यानाच्वंगु फोटो छपाः पोष्ट यासें ‘नेपाः–भारत स्वापू विशिष्ट जू’ धकाः टिप्पणी यानादीगु दु । चीनय् प्रम ओलीं मोदीलिसे नं अलग्ग नापलायेगु धकाः ज्याझ्वः दयेकातःगु दुसां ई धाःसा मिले मजूनिगु खँ धाःगु दु । अथे खःसां तियानचिनया हुलमुलय् नापलाःगु किपायात नं नरेन्द्र मोदीं कुटनीतिक रुपं उपयोग याःगु खँ धयाहःगु दु ।
ओलीं छुं ई लिपा भारतया औपचारिक भ्रमण याइगु ज्याझ्वः दुसा अन नं लिपुलेकया खँ ल्ह्वनेगु धकाः ज्याझ्वः दयेकातयेधुंकूगु दु ।
LEAVE YOUR COMMENTS