‘खटे याःथाय् वने तर अन्याय याये दइ मखु’

येँ -नेपाल विद्युत प्राधिकरणया कार्यकारी निर्देशक हितेन्द्रदेव शाक्यं थःत उचित जिम्मेवारी बिल धाःसा ग्वाहालि यायेगु खँ धयादीगु दु । म्हिगः छुं पत्रकारतलिसे खँ ल्हासें वय्कलं सरकारं थःत न्ह्याग्गु जिम्मा बिउसां नं स्वीकार्य दुगु खँ धयादीगु खः ।

प्राधिकरणय् कुलमान घिसिङयात हयेगु चर्चा जुयाच्वंगु इलय् वय्कलं पत्रकारलिसे खँ ल्हासें प्राधिकरणं थः चिलेत तयार दुसां नं अन्याय यात धाःसा थः कानुनी लँपु मालेत बाध्य जुइगु ख्याच्वः नं बियादिल ।

शाक्यं धयादिल, ‘सरकारं सही ढंगं ज्याया जिम्मा बिल धाःसा जि ज्या यायेत तयार दु, जि कर्मचारी जूगुलिं सरकारं छ्वःगु थासय् वनाः ज्या मयायेगु जुइ मखु, तर जितः असक्षम क्यनाः जबरजस्ती लिकायेत स्वल धाःसा वा अन्याय यात धाःसा अदालत तक वनेगु लँपु ला द हे दु ।’

वय्कलं ऊर्जा मन्त्री पम्फा भुसाल वना सुना नं थःत राजीनामा बीत निर्देशन वा इनाप मयाःगु खँ स्पष्ट यानादिल । थम्हं न्हय्लाया दुने आपालं ज्या यानागु दावी यासें वय्कलं थुगु दँय् प्राधिकरणया लबः म्हो जूगुया कारण प्रशासकीय मखुसें प्राविधिक जूगु खँ नं कनादिल ।

मेखे सामाजिक सञ्जालय् धाःसा कुलमानयात मेगु न्हूगु थाय्या जिम्मेवारी बियाः शाक्ययात अन हे कायम याना तयेमाःगु सुझाव बीपिं नं अप्वया वःगु दु ।