ने.सं. छ्यलेत येँ मनपायात इनाप

येँ (नेपालभाषा टाइम्स)÷नेपाल संवत् न्हूदँ राष्ट्रिय समारोह समिति ११४४ पाखें येँ मनपां सरकारी ज्याखँय् नेपाल संवत् छ्यला यंकेत इनाप याःगु दु । समितिपाखें म्हिगः बुधवाः येँ मनपाया मेयर बालेन साहयात नापलानाः थ्व इनाप याःगु खः ।

थ्व झ्वलय् येँ महानगरपालिकां नेपाल संवत् ११४४ न्हूदँ लसताय् तुच्चा ज्याझ्वः यायेत नं समितिं इनाप याःगु खः । उगु तुच्चा ज्याझ्वः महानगरीयस्तरीय यायेगु नितिं नं इनाप याःगु दु ।

अथेहे न्हूदँ कुन्हु बसन्तपुलिइ भिंतुना सभा व ¥याली याइगु जूगुलिं येँ मनपां उकिया व्यवस्थापन यायेत नं इनाप याःगु खः । समितिया दुजःपिंसं तःगु थीथी खँयात मेयर साहं सकारात्मक रुपं कासें समारोह समितिनाप सहकार्य यानाः ज्या यायेगु बचं बियादीगु खः ।