शिक्षकतय् आन्दोलनयात मनपाया विरोध
येँ (नेपालभाषा टाइम्स)-शिक्षा ऐनप्रति असन्तुष्टि प्वंकुसें शिक्षकतय्सं यानाच्वंगु आन्दोलनया नामय् विद्यालय बन्द यात धाःसा कारबाही यायेगु ख्याच्वः येँ महानगरपालिकां बिउगु दु । सदनय् न्ह्यब्वःगु विद्यालय शिक्षा विधेयक प्रति असन्तुष्टि प्वंकुसें म्हिगः निसें सरकारी विद्यालयया शिक्षकतय्सं विद्यालय बन्द यानाः येँया फिब्व ख्यलय् प्रदर्शन याःगु खः । तर येँ मनपां धाःसा विद्यालय बन्द यानाः न्ह्याकीगु आन्दोलन थःपिंत स्वीकार्य मजू धासें उकी ब्वति काइपिंत कारबाही यायेगु खँ धाःगु दु । म्हिगः येँ मनपा शिक्षा विभागया प्रमुख सिताराम कोइरालां छगू सुचं जारी यासें थ्व जानकारी बियादीगु खः।
महानगरपालिकाया प्रवक्ता नविन मानन्धरं धाःसा विद्यालय बन्द यात धाःसा कारवाही यायेगु धकाः मनपां धाःसां नं गज्याःगु कारवाही जुइ धइगु खँ धाःसा स्पष्ट मजूगु खँ कनादिल । म्हिगः अथें नं विद्यालय विदा जूगुलिं विद्यालय बन्दया बारे छुं निर्णय मजूगु जानकारी नं बियादिल ।
थ्वहे झ्वलय् येँ मनपां मनपा दुने लाःगु विद्यालयत बन्द जू मजू धकाः थौं अनुगमन समेत याइगु खँ सीदुगु दु । विद्यालय बन्द यात धाःसा प्रधानाध्यापक व हाजिर मजूपिं शिक्षक तय्त कारबाही यायेगु खँ धाःगु दु ।
म्हिगः शिक्षकतय्सं याःगु प्रदर्शनया कारणं स्वनिगःया यातायात अस्तव्यस्त जूगु खः । शिक्षकतय्सं म्हिगः फिब्व ख्यः जायेक प्रदर्शन याःगु खः। प्रदर्शनया कारणं फिब्वख्यः जुयाः न्ह्याइगु सवारी साधनयात मेगु लँपुं छ्वयेमाःगु खः ।
शिक्षकतय्सं प्रदर्शनया झ्वलय् ‘विद्यालय शिक्षक कर्मचारीयात जुयाच्वंगु ज्यादती बन्द या, शिक्षाय् मुक्कं बजेटया २० प्रतिशत लगानी या’ धइगु प्लेकार्ड नं ब्वःगु खः ।
शिक्षक महासंघं अस्थायी शिक्षक तय्त राहत बीमाःगु, साविक उमावि, अस्थायी÷करार, शिक्षक सिकाइ अनुदान, विशेष शिक्षा, प्राविधिक धार लगायतया शिक्षकतय्त आन्तरिक परीक्षां स्थायी यायेमाःगु, विद्यालय कर्मचारीया दरबन्दी सिर्जना यानाः स्थायी प्रकृतिइ यंकेमाःगु, निवृत्तिभरण व पेन्सनया नितिं अस्थायी सेवा अवधिया नं गणना यायेमाःगु, प्रधानाध्यापकया नियुक्ति शिक्षक सेवा आयोगं यायेमाःगु, टे«ड युनियनया अधिकार दयेमाःगु माग याःगु खः ।
थ्व स्वयां न्ह्यः येँ मनपां शिक्षक कर्मचारीतय्त बन्द हडताल मयायेत ख्याच्वः बिया वयाच्वंगु खः । विद्यालय शान्ति क्षेत्र जूगुलिं विद्यालयया शिक्षक कर्मचारी बन्द हडतालय् कुहां वल धाःसा सेवां बर्खास्त याये फइगु ख्याच्वः नं येँ मनपां बिउगु दु ।
मनपां जारी याःगु सुचनय् आः सदनय् दर्ता जूगु शिक्षा विधेयकय् संविधानकथं स्थानीय तहयात बियातःगु शिक्षा सम्बन्धी अधिकार हानं केन्द्रय् हे यंकेगु कथं यानातःगु व्यवस्थाबारे थःपिनि ध्यानाकर्षण जूगु खँ नं धयातःगु दु । तर उकियात विद्यालय बन्द यानाः विरोध यायेगु धकाःसा पाय्छि मखु धाःगु दु । शिक्षा ऐनया थुगु प्रावधानयात गाउँपालिका संघ व नगरपालिका संघं नं विरोध यायेधुंकूगु दु । शिक्षक आन्दोलनय् ब्वति कायेत नेवाः स्यनामितय्त नं ब्वनातःगु खःसां मनपाया सुचं लिपा धाःसा नेवाः स्यनामित उकी सहभागी जुइ मछिंगु खँ धाःगु दु ।
LEAVE YOUR COMMENTS