थनिंनिसें आचार संहिता लागू

येँ – वैशाख ३० गते जुइगु स्थानीय चुनावयात ध्यानय् तयाः निर्वाचन आयोगं म्हिगः वंगु चान्हय् १२ निसें निर्वाचन आचार संहिता लागू याःगु दु । निर्वाचन आयोगं तयार याःगु थ्व आचार संहिताया आः तकया हे दकलय् कडाकथंयागु दु धकाः टिप्पणी याना हःगु दुसा थुकियात कयाः आलोचना नं जूगु दु ।

थ्व आचार संहिता कथं सुं नं व्यक्ति, कर्मचारी, सञ्चार माध्यम, गैर सरकारी संस्थां सुं नं उम्मेदवारया प्रचार याये दइ मखु । उलि जक मखु उमिसं सामाजिक सञ्जालय् सुं नं उम्मेदवारया पक्षय् च्वये दइ मखुसा सुनानं च्वया हल धाःसा उकियायात लाइक व कमेन्ट तकं याये दइ मखु ।

उम्मेदवारतय्सं चुनाव प्रचार याइबलय् नं पार्टीया ध्वाँय् वा चुनाव चिं छापे यानातःगु टीशर्ट, क्याप, ज्याकेट, भेष्ट, गम्छा, मास्क, लकेट वा झोला क्वबिया जुइ दइ मखु । पार्टी चिं वा चुनाव चिं अंकित यानातःगु स्टिकर, ब्याज थेंज्याःगु सामग्री तकं छापे यायेगु वा उत्पादन याये दइ मखु । चुनाव प्रचारय् वनेबलय् उम्मेदवारया बारे च्वयातःगु ए–४ साइजया पर्चा जक इने दइ ।

चुनाव प्रचार यायेबलय् नं छुं नं स्कुल वा कलेजया क्षेत्र प्रयोग याये दइ मखु । सामाजिक सञ्जालय् नं सुं उम्मेदवारया प्रचार यायेगु ताः तयाः फेक आइडी तयाः एकाउन्ट चले याये दइ मखु । चुनाव न्ह्यः छुं नं संस्था व सञ्चार माध्यमं मतदान सर्वेक्षण यानाः उकिया लिच्वः सार्वजनिक याये दइ मखु । मतदान लिपा धाःसा अज्याःगु सर्वेक्षणया लिच्वः पिकाये फइ ।

लिसें सरकारं नं थ्व आचार संहिता लागू जुइधुंकाः सुं नं कर्मचारीयात सरुवा बढुवा याये मदइगु, पुलांगु जारी योजना बाहेक न्हूगु योजना सञ्चालन याये मदइगु जक मखुसें शिलान्यास, उद्घाटन थेंज्याःगु ज्याझ्वलय् सहभागी नं जुइ मखु ।

सम्बन्धित बुखँ

LEAVE YOUR COMMENTS