यति एयरलाइन्सय् थप एटिआर विमान

येँ – निजी ख्यःया विमान कम्पनी यति एयरलाइन्सं न्हूगु एटिआर विमान हःगु दु । कम्पनीं शनिवाः नाइन एन एएनजी कलसाइनया एटिआर ७२–५०० विमान हःगु दु । यतिया थ्व न्यागःगु एटिआर विमान खः । थ्व विमान ७२ सिट क्षमताया खः । यति एयरलाइन्सं थ्व विमान हयेधुंकाः थःपिंसं दयेकागु स्वदँया गुरुयोजना सफल जूगु खँ धाःगु दु ।

थ्व विमानया लिसें यतियाके आः झिगः जहाज दत । थुकी न्यागः जेट स्ट्रिम लानाच्वंगु दु । यति एयरलाइन्सं आः थःगु क्षमता अझ अप्वयेकाः बुलुहुँ जेटस्ट्रिमयात फेज आउट यानाछ्वयेगु व पूवंक हे एटिआर पाखें सेवा बीगु तयारी यानाच्वंगु दु । यतिया न्यागःगु एटिआर शनिवाः थाइल्यान्डया बैंककं हःगु खः ।

थ्वयात वरिष्ठ पाइलटपिं आरके सिद्धि व आरवी क्षेत्रीं ब्वयेकाहःगु खः । झिंनिदँ पुलांगु थ्व जहाज थाइल्यान्डया नोक एयरं चले यानाच्वंगु विमान खः । यतिं नोकपाखें थ्व विमान न्यानाहःगु खः ।कम्पनीं न्हूगु विमानं येँ नं धनगढी तक नियमित उडान यायेगु तयारी याःगु दु । थौंकन्हय् यतिं पोखरा, जनकपुर, भैरहवा, नेपालगञ्ज, भरतपुर, तुम्लिङटार, भद्रपुर, विराटनगरय् नियमित उडान यानाच्वंगु दु ।

सम्बन्धित बुखँ

LEAVE YOUR COMMENTS