नेपाल संवत् छ्यलेत पत्राचार

येँ (नेपालभाषा टाइम्स)- नेपाल संवत्यात सरकारी दस्तावेजय् नं छ्यलेगु लागिं नेपाल सरकारया मन्त्रालयतय्सं सर्कुलर जारी याःगु दु । मन्त्रालयतय्सं जारी याःगु थ्व सर्कुलरया नापनापं सरकारी पौ व थीथी दस्तावेजय् नेपाल संवत्या तिथि न्ह्यथनेगु ज्या नं शुरु जूगु दु ।

नेपाल सरकारं वंगु लक्ष्मीपुजा अर्थात वि.सं. २०८० साल कार्तिक २७ गते च्वंगु मन्त्रिपरिषद् बैठकं नेपाल संवत्यात नं सरकारी ज्याखँय् छ्यलेगु धकाः निर्णय याःगु खः । वकुन्हु हे मुख्य सचिव बैकुण्ठ अर्यालं संस्कृति, पर्यटन तथा नागरिक उड्डयन मन्त्रालययात पौ छ्वयाः ने.सं. ११४४ निसें फुक्कं सरकारी भ्वँतय् नेपाल संवत् नं उल्लेख या धकाः निर्देशन बियादीगु खः ।

वहे पौया लिधंसाय् ने.सं. ११४४ थिंलागा ५ (वि.सं. २०८० पुस १६ गते) कुन्हु संस्कृति, पर्यटन तथा नागरिक उड्डयन मन्त्रालय संस्कृति महाशाखाया शाखा अधिकृत राजकुमार दुलालं संघीय मामिला तथा सामान्य प्रशासन मन्त्रालययात पौ च्वयाः फुक्क प्रदेश सरकार, फुक्क जिल्ला समन्वय समिति व फुक्क गाउँपालिका लिसें नगरपालिकातय्त नेपाल संवत् नं छ्यलेगु लागिं निर्देशन बियाछ्व धकाः आदेश बियादिल ।

नेपाल संवत् छ्ले अःपुइमा धकाः संस्कृति मन्त्रालयं पञ्चांग निर्णायक समितिपाखें तयार यानातःगु क्यालेण्डरया छगू चांग नं बियाछ्वःगु खः । पञ्चांग निर्णायक समितिं बिस्कं तयार याःगु क्यालेण्डरय् विक्रम संवत्या हरेक दिनयात हे नेपाल संवतं गय् यानाः च्वइ धकाः क्यनातःगु दु । थ्व क्यालेण्डर न्ह्यःने दत धाःसा विक्रम संवत्यात नेपाल संवतय् याउँक हीकाः च्वये फइ ।

संस्कृति मन्त्रालयया पौ वयेवं ने.सं. ११४४ थिंलागा १२ (२०८०÷९÷२३) कुन्हु संघीय मामिला तथा सामान्य प्रशासन मन्त्रालयया स्थानीय तह समन्वय शाखाया शाखा अधिकृत दीपेश कट्टेलं फुक्क हे जिल्ला समन्वय समिति, फुक्क नगरपालिका व फुक्क गाउँपालिकातय्त पौ छ्वयाः आवंलि थःपिनि फुक्कं भ्वँतय् नेपाल संवत् नं
छ्यलेगु धकाः जानकारी याकूगु दु ।

संस्कृति मन्त्रालय व संघीय मामिला मन्त्रालयतय्सं थ्व निर्देशन जानकारी बीत च्वयातःगु पतिइ नं नेपाल संवत् उल्लेख यानातःगु दु ।
अथे हे गृह मन्त्रालयपाखें नं ११४४ थिंलागा ३० (पुस २६ गते) थःगु मातहतया फुक्क हे निकायतय्त पौ छ्वयाः नेपाल संवत् छ्यलेत निर्देशन बिउगु दु । गृहया पौ राष्ट्रिय परिचयपत्र तथा पंजीकरण विभाग, जिल्ला प्रशासन कार्यालय (सीडीओ) तय्त नं छ्वया तःगु दु । गृहया थ्व निर्देशन कथं नेपाली नागरिकतां काइगु नागरिकताया प्रमाणपत्रय् तक नं जारी मिति तइबलय् विक्रम संवत्या नापनापं नेपाल संवत् नं छ्यलेगु लँ चाःगु खँ धाःगु दु ।

प्रधानमन्त्री पुष्पकमल दाहाल प्रचण्डं न्हूदँ ११४४ या लसताय् जूगु थीथी ज्याझ्वलय् नेपाल संवत्यात सरकारी दस्तावेजय् नं छ्यले बीगु धकाः बचं बियादीगु खःसा व स्वयां छन्हु न्ह्यः मन्त्रिपरिषदं नं थ्व निर्णय याःगु खः । आः उकियात कार्यान्वयन यायेगु लागिं मन्त्रालयपाखें नं क्वय्या निकायतय्त पत्राचार याःगु खः । नेपाल संवत्यात सरकारी दस्तावेजय् छ्यलेगु लागिं मन्त्रालयतय्सं याःगु थ्व पत्राचार नं महत्वपूर्ण ज्या खः धाःगु दु ।