अक्सिजन प्लान्टया सफल परीक्षण

किपू- किपू अस्पतालय् स्थापना याःगु अक्सिजन प्लान्टया सफल परीक्षण सफल जूगु दु । किपू नगरपालिकाया ग्वाहालिइ अस्पतालय् अक्सिजन प्लान्ट स्थापना याःगु खः ।
किपू नगरपालिकाया प्रमुख रमेश महर्जएन, उपप्रमुख सरस्वति खड्का, अस्पतालया निमित्त निर्देशक डा. पेरु प्रधानया उपस्थितिइ अस्पतालय् स्थापना याःगु अक्सिजन प्लान्टया परीक्षण याःगु खः ।

किपू नगरपालिकाया छगू करोड आर्थिक ग्वाहालिइ उगु अक्सिजन प्लान्ट स्थापना याःगु खः । कोरोना संक्रमितया निंतिं अति आवश्यक अक्सिजनया अभाव जुइवं छुं ई न्ह्यः जक नगरपालिकां अक्सिजन प्लान्टया निंतिं छगू करोड आर्थिक ग्वाहालि याःगु खः । नगरपालिकां छगू करोडया लगानीइ स्थापना याःगु अक्सिजन प्लान्ट टर्कीया एडलेजिङ इन्टरनेशनलपाखें उपलब्ध याकूगु खः ।

कोरोना भाइरस (कोभिड–१९)या निगूगु लहरया संक्रमण ब्यापक जुइवं संक्रमितया निंतिं आवश्यक अक्सिजनया व्यापक अभाव जूगु खः । अक्सिजनया अभावया कारणं थीथी अस्पतालय् थःगु हे अक्सिजन प्लान्ट स्थापना यायेगु याना हयाच्वंगु दु ।

थुकथंया अक्सिजन प्लान्टय् प्राकृतिक रुपय् फसय् दइगु २१ प्रतिशत अक्सिजनया मात्रायात प्लान्टय् मोस्चराइज्डरहित यानाः सुख्खा हावा जक छ्वयेगु याइ । उगु हावायात नं शुद्ध अक्सिजनया मात्रायात जक तयाः ल्यं दुगु फय् छाने यानाः पिने हे छ्वयेगु व व हे अक्सिजनयात भण्डारण यानाः अक्सिजन आवश्यक जूपिं ल्वगितयात उपलब्ध याकेगु याइ ।

अक्सिजन प्लान्टया सफल परीक्षण लिपा आः याकनं हे औपचारिक रुपं अक्सिजन उत्पादन यायेगु तयारी जुयाच्वंगु अस्पताल प्रशासनं जानकारी बिउगु दु ।

सम्बन्धित बुखँ

LEAVE YOUR COMMENTS