सुर्यविनायक–धुलिखेल सुरुङमार्ग दयेकेत वइगु महिनाय् सम्झौता जुइगु

येँ – सूर्यविनायक–धुलिखेल सुरुङमार्ग दयेकेगु निंतिं वइगु महिनाय् जापानलिसे त्यासा सम्झौता जुइगु जूगु दु । सुरुङ मार्ग दयेकेगु निंतिं नेपाः व जापान सरकार दथुइ सम्झौता यायेगु तयारी जुयाच्वंगु खँ वैदेशिक समन्वय महाशाखा प्रमुख सञ्जयकुमार श्रेष्ठं धयादीगु दु । वय्कःया कथं मे महिना दुने हे जापानी पुचः त्यासा सम्झौताया निंतिं नेपाः वयेत्यंगु दु ।

नेपाः व जापान दथुइ मे महिनाय् जुइगु द्विपक्षीय बैठकं सुरुङमार्ग व सतक विस्तार सम्बन्धी निर्णय याइगु खँ नं वय्कलं धयादीगु दु । महाशाखाया कथं मेया अन्तिम पाखे जापानी पुचः नेपाः वइ । वंगु मार्चय् जापानी अन्तर्राष्ट्रिय सहयोग नियोग (जाइका)या छगू पुचः नेपाः वयाः सुरुङ मार्ग दयेकेगु बारे न्हापांगु चरणया सहलह यानावंगु खः । उबलय् त्यासा सम्झौता यानाः सुरुङमार्ग दयेकेगु निर्णय जूगु खः ।

ख्वपया पलाँसे लिक्क लाःगु गणेश मन्दिर सिथं धुलिखेल तक वनीगु सुरुङ मार्ग दयेकेत्यंगु खः । पलाँसें धुलिखेल वनेगु लँ तसकं चाःचाःहिउगु जूगुलिं अन सुरुङ मार्ग दयेकेगु ग्वसाः ग्वःगु खः । थ्व खण्डय् सुरुङ मार्गया लिसें १६ किलोमिटर लँ ८ लेनय् विस्तार यायेगु तयारी जुयाच्वंगु दु । थुकिया निंतिं २५ अर्ब लागत तुइगु अनुमान यानातःगु दु । गुकी छुं प्रतिशत नेपाःपाखें लगानी जुइ ।