पशुपति दुनेया भिडियो पिहां वल
येँ (नेपालभाषा टाइम्स)÷सकल हिन्दू मात्रया तःधंगु तिर्थस्थल पशुपतिनाथया देगःया भिडियो सार्वजनिक जूगु दु । पशुपति दुने भिडियो जक मखु किपा तकं कायेगुली प्रतिबन्ध धयातःगु दु ।
छगू भारतीय टेलिभिजन च्यानल राइजिङ रुद्र टिभींं पशुपतिनाथ देगः दुनेया थ्व भिडियो प्रशारण याःगु खः । उगु टिभीं म्हिगः थ्व भिडियो अपलोड याःगु खः । भिडिया १० मिनेट स्वयां नं अप्वः खिचे यानातःगु दु ।
भिडियो खिचे यायां पशुपतिबारे बयान नं यानाच्वंगु तायेदु । पशुपतिनाथ बार हिन्दी भासं हे बयान यानाच्वंगु खः । बयान याःम्ह मनुखं पशुपतिनाथया देगः दुने भिडियो व फोटो खिचे यायेगु प्रतिबन्धित दु धकाः नं न्ववाःगु दु ।
थौंकन्हय् मोबाइल तकं यंके मदु यानातःगु पशुपतिया थ्व देगः दुने १० मिनेट ताःहाकःगु भिडियो गय् यानाः खिचे यात धकाः चर्चा शुरु जूगु दु । भारतीय च्यानलं प्रशारण याःगु थ्व भिडियो म्हिगःनिसें नेपाःया सामाजिक सञ्जालय् नं गाक्कं भारइल जूगु दु । थ्व भिडियो पिहां वःगु खँय् पशुपति विकास कोष छु यानाच्वन धकाः नं कडा आलोचना यानाहःगु दु । तर म्हिगः बहनी तक कोषं धाःसा छुं धाःगु मदुनि ।
भिडियो खिचे याःम्ह मनुखं देगः दुनेया फुक्क धइथें प्रमुख थाय् व अंशया भिडियो खिचे यानातःगु दु । भिडियो खिचे यानातःगु शैली स्वयेबलय् थ्व क्यामेरा वा मोबाइलं तप्यंक खिचे यानातःगु मखुसें तपुलि वा कोटया ताँखय् तयातइगु गोप्य क्यामेरां खिचे यानातःगु खनेदु धाःगु दु । गुलिस्यां धाःसा थ्व आःयागु मखु, प्यदँ पुलांगु धकाः नं कमेन्ट यानाहःगु दु । प्रतिबन्धित थाय्या भिडियो सार्वजनिक जूगुलिं आस्थाय् घाः लाइगु खँ धाःगु दु ।
LEAVE YOUR COMMENTS