ताहाचलय् नक्कली लुँ क्यनाः ठगे याःपिं खुम्हेसित ज्वन

येँ -येँया ताहाचलं नक्कली लुँ क्यनाः ५५ लाख तका ठगे याना यंकूगु छगू पुचःयात ज्वंगु दु । प्रहरीं धाःकथं ज्वंपिं सन्तबहादुर लामा, ऋषमान घले, मेख तामाङ, अभय चौधरी, जेरी तामाङ व राज तामाङ खः ।

प्रहरीया कथं उमिसं ताहाचलय् च्वनीम्ह छम्ह मनूयात माघ २१ गते लुँ थें खनेदुगु छगू किलो म्हासुगु धातु क्यनाः ५५ लाख तका ठगे याःगु खः । वंगु माघ २६ गते पीडितं अपराध महाशाखाय् थुकिया बारे उजुरी बिउगु खःसा उगु हे उजुरीया आधारय् येँया थीथी थासं उमित ज्वंगु खः ।
ज्वंपिंपाखें प्रहरीं ९ लाख ५० हजार नगद, निगः मोटरसाइकल व न्यागः मोबाइल नं बरामद याःगु दु । प्रहरीं थुकिया बारे थप अनुसन्धान यायेया निंतिं ज्वंपिंत महानगरीय प्रहरी परिसरय् छ्वःगु दु ।