पदोन्नति जूपिं प्रहरी अधिकृततय्त दज्र्यानी चिं

येँ –  प्रहरी महानिरीक्षक सर्वेन्द्र खनालं पदोन्नति जुयादीपिं प्रहरी अधिकृतपिंत दज्र्यानी चिं प्रदान यानादीगु दु । नेपाल सरकारया वंगु फागुन ७ गतेया निर्णयकथं प्रहरी वरिष्ठ उपरीक्षक व प्रहरी उपरीक्षक पदय् पदोन्नति जुयादीपिं प्रहरी अधिकृततय्त प्रहरी प्रधान ज्याकुथिइ जूगु छगू ज्याझ्वःया दथुइ दज्र्यानी चिं प्रदान यानादीगु खः ।

पदोन्नति जुयादीपिंलय् प्रहरी उपरीक्षकं प्रहरी वरिष्ठ उपरीक्षकय् झिंस्वम्ह व प्रहरी नायब निरीक्षक पदं प्रहरी उपरीक्षक पदय् पदोन्नति जुयादीपिं नीखुम्हेसित दज्र्यानी चिं लःल्हाःगु खः । पदोन्नति जुयादीपिंमध्ये छम्ह प्रहरी वरिष्ठ अधिकृत धाःसा थौंकन्हय् संयुक्त राष्ट्र संघ अन्तर्गतया मिसनय् खटे जुयाच्वंगु प्रहरी प्रधान ज्याकुथिं न्ह्यथंगु दु ।

दज्र्यानी चिं लःल्हायेगु ज्याझ्वःयात संबोधन यासें प्रहरी महानिरीक्षक खनालं संगठन व सेवाप्रति, कर्तव्य निष्ठ, निष्ठा, क्षमता, व्यावसायिकता व कर्तव्यप्रति इमान्दार जुयाः प्रहरी कर्मचारीं न्ह्याबलें नं संगठनया श्रृवृद्धिया निंतिं छप्पँ जुयाः ज्या यायेमाःगु खँय् बः बियादिल ।

देय्या सार्वभौकिताय् लिच्वः लाइकथंया क्रियाकलाप व गैरकानूनी गतिविधि याइपिं विरुद्ध कानूनी कारवाही यायेत प्रहरी कर्मचारीत एकतावद्ध जुयाः सशक्त व दृढतापूर्वक न्ह्याः वनेमाःगु खँय् नं वय्कलं बः बियादिल ।

ज्याझ्वलय् पदोन्नति जुयादीपिं प्रहरी अधिकृततय्पाखें प्रहरी वरिष्ठ उपरीक्षक सन्दीप भण्डारीं पदान्नती थःपिनिगु दथुइ ज्या यायेत अझ अप्वः उत्साह ब्वलंगुलिसें थप उर्जा संचार जूगुु धासें मंकाःकथं मन, बचं व कर्मं संगठन व आम नागरिकप्रतिया जिम्मेवारी पूवंकेत दृढ संकल्पित जुयाः न्ह्याः वनेगु प्रतिवद्धता प्वंकादिल । उगु इलय् प्रहरीया थीथी तहया आपालं उच्च अधिकृततय् उपस्थिति दुगु खः ।

 

सम्बन्धित बुखँ

LEAVE YOUR COMMENTS