येँ महानगरपाखें सिन्धुपाल्चोकया खुसिबालं प्रभावित नगरपालिकायात ग्वाहालि लःल्हात

येँ- येँ महानगरपालिकां सिन्धुपाल्चोक जिल्लाया खुसिबालं प्रभावित स्वंगू स्थानीय निकाययात आर्थिक ग्वाहालि लःल्हाःगु दु । वंगु असार ३ गते येँ महानगरया गुक्वःगु अधिवेशनय् खुसिबालं प्रभावित जिल्लाया मेलम्ची नगरपालिकायात निगू करोड, हेलम्बु व पाँचखाल थाङ्पाल गाउँपालिकायात ५०, ५० गू लाख आर्थिक ग्वाहालि यायेगु निर्णय याःगु खः ।

येँ महानगरपालिकाया प्रमुख विद्यासुन्दर शाक्यया नेतृत्वय् वडाअध्यक्ष व कार्यपालिकाया दुजःपिंसहितया छगू प्रतिनिधिमण्डल सिन्धुपाल्चोक वनाः उगु आर्थिक ग्वाहालि लःल्हाःगु खः । येँ महानगर प्रमुख शाक्यं मेलम्ची नगरपालिकाया प्रमुख डम्बरबहादुर अर्यालयात निगू करोड व पाँचखाल थाङ्पाल गाउँपालिकाया अध्यक्ष टाँसी लामायात ५० गू लख दां लःल्हानादीगु खः ।

उगु इलय् निवर्तमान स्वास्थ्यमन्त्री शेरबहादुर तामाङ, संघीय व बागमति प्रदेशया दुजःपिं, येँ महानगर प्रमुख प्रशासकीय अधिकृत राजेश्वर ज्ञवाली, नगरपालिकाया उपप्रमुख भगवती नेपाल, गाउँपालिकाया उपाध्यक्ष सुनिता अधिकारी, जनप्रतिनिधि व पदाधिकारीतय् उपस्थिति दुगु खः ।

आर्थिक ग्वाहालि लःल्हायेगु ज्याझ्वलय् निवर्तमान मन्त्री तामाङं विपद् व्यवस्थापनया निंतिं पालिकात थःपिंसं हे कोष दयेकाः संचालन यायेत सुझाव बियादिल । जिल्लाया हे जुरेया चलः व्यवस्थापन यायेत प्राप्त ध्यबा जिल्ला प्रशासन ज्याकुथिइ जम्मा जुयाच्वंगु धयादिसें कानूनी जटिलताया कारणं संकलन जूगु ध्यबा खर्च याये मफयाच्वंगु धयादिल ।

येँ महानगर प्रमुख शाक्यं मेलम्चीलिसें खुसिबाः व चलखं प्रभावितगरपालिकालिसें हेलम्बु व थाङपालय् वःगु प्राकृतिक विपत्तिं अनया जनतायात जूगु दुःखय् येँ महानगर व महानगरवासीयापाखें ग्वाहालि यायेत थःपिं वयागु खः धासें विपदं लाकूगु प्रभावया तुलनाय् थ्व ग्वाहालि तसकं चीधं खः, तर थःपिं दुःख इनेत वयागु खः धयादिल ।

‘प्राकृतिक विपद् नियमित प्रक्रिया खः’, वय्कलं धयादिल, ‘तत्काल पुनःस्थापना नं याये फइमखु । लिसें थुकथंया विपत्तिया सामना यायेत नेतृत्व पक्ष गबलें नं हरेस नये मजिउ ।’

मेलम्ची नगरप्रमुख अर्यालं नगरया १३ गू वडामध्ये प्यंगू वडालिसे आःतक नं सम्पर्क मदुनिगु व खुसिबालं खुगू वडाय् तसकं बांमलाक प्रभाव लाकूगु जानकारी बियादिसें छु गुलि क्षति जुल धइगु बारे विवरण संकलन यायेगु ज्या जुयाच्वंगु दु धयादिल ।

उगु इलय् प्रदेशसभा सदस्य माधव पौडेलं गाउँपालिकाया अध्यक्ष लामां विपद्या घटना बारे जानकारी बियादीगु खः ।

येँ महानगरया असार ३ गतेया अधिवेशनया न्हापांगु बैठकं महानगरलिसे भगिनी सम्बन्ध स्थापना जूगु मेलम्ची नगरपालिका व असार ४ गतेया निगूगु बैठकं निगू गाउँपालिकायात आर्थिक ग्वाहालि यायेगु निर्णय याःगु खः ।