सिड्नीइ मेगु लछि नं लकडाउन

एजेन्सी- कोरोना भाइरस नियन्त्रणय् मवःगुलिं अस्टे«लियाया सिड्नीइ मेगु लछि लकडाउन थप याःगु दु । कोरोना संक्रमण अप्वया वंगुलिं वंगु जुन २५ तारिखनिसें तयातःगु लकडाउन थ्व हे जुलाई ३१ तरिखय् सिधयेत्यंगु खःसा लकडाउनया अवधि थप यासें अगस्ट २८ तक थ्यंकूगु दु ।

न्यू साउथ वेल्सया प्रिमियर ग्लाडिस बेरेजिक्लयानं लकडाउन न्हापासिबें नं कडा जुइगु धाःगु दु । अस्टे«लियाया सिड्नी, सेन्ट्रल कोस्ट, ब्लु माउन्टेन, सेल हार्बर व ओलोङगङ लागाय् लकडाउन तयातःगु दु । ग्लाडिस बेरेजिक्लयानं न्यू साउथ वेल्सय् कोरोना संक्रमण न्यनावंगुलिं लकडाउन थप यायेमाःगु धाःगु दु । न्यू साउथ वेल्सय् बुधवाः १७७ म्ह न्हूपिं कोरोना संक्रमितत खनेदुगु खः । मार्च लिपा खनेदुगु थ्व उच्च ल्याः खः ।

सरकारी तथ्याङ्ककथं न्यू साउथ वेल्स राज्यय् थ्व वाःया दुने १०५० संक्रमित खनेदुगु खःसा वंगु वालय् ६५१ म्हेसिके कोरोना खनेदुगु खः । राज्यय् २२९१ सक्रिय संक्रमित दु । कोरोनां यानाः बुधवाः छम्ह मनू सीगु दु । सिड्नीइ थुुगुसी जक २५ सय कोरोना संक्रमित खनेदयेधुंकल ।

अस्टे्लियाय् मेमेगु देशय्सिबें कोरोनाया प्रभाव कम खनेदु । अस्टे«लियाया सरकारं सीमा बन्द यानाः, पिनें वइपिंत क्वारेन्टिनय् तयाः व लकडाउन तयाः कोरोनायात नियन्त्रणय् तयावयाच्वंगु दु । थुगुसी धाःसा कोरोनाया डेल्टा भेरियन्टं अस्टे«लियाय् न्हापासिबें संक्रमण अप्वयेकूगु दु ।
अस्टे«लियाया भिक्टोरिया व साउथ अस्टे्लियाय् तयातःगु लकडाउन बुधवाःनिसें लिकाःगु दु ।