थिमिइ मल्लकालीन लाय्कू भैलः प्याखं

थिमि(नेपालभाषा टाइम्स)÷ मध्यपुर थिमिइ सापारुया कन्हसंनिसें क्यनीगु भैलःप्याखं वंगु शनिवाःनिसें शुरु जूगु दु । मल्लकालनिसें न्ह्याःगु धयातःगु थ्व प्याखं सापारुया छन्हुलिपा शुरु जुयाः प्यन्हुतक क्यनी ।

ऐतिहासिक व तान्त्रिक शक्तिं जाःगु भैलःप्याखं मध्यपुर थिमि नगरपालिका ६ चपाचोय् च्वंगु द्यःछेँपाखें शुरु जूगु खः । चान्हसिया इलय् क्यनीगु थ्व प्याखं चपाचो द्यःछेँपाखें शुरु जुयाः चपाचो नासः द्यः प्रांगण, गार्चा गणेद्यः, थामद्यः गुंगः चीभाः न्ह्यःने व लिउने, कुतिं चीभाः हात्ति मांकाःद्यः, दिगु त्वाः इना लाछि, थिमि लाय्कू, मरुत्वाः, बालकुमारी लिउनेया दबू, बालकुमारी न्ह्यःने, बालकुमारी भैलः द्यः न्ह्यःने दिगु त्वालय् च्वंगु भैलः द्यः न्ह्यःने, दिगु त्वाःया नारांद्यः, कुम्हाः ननि, तुलंननि, नासननि, चपाचो, जँलाननि, चपाचो द्यःछेँय् चछियंकं क्यनाच्वंगु दु ।

तन्त्रमन्त्रपाखें दैवी शक्ति आह्वान यानाः प्याखं हुलीपिं देवगणं दैवी शक्ति धारण यायेवं शुरु जुइगु भैलः प्याखय् भैलः निम्ह, दागिं निम्ह व ज्यापुंगचा छम्ह यानाः न्याम्ह देवगणया पुचलं थ्व प्याखं चछियंकं क्यनेगु याना वयाच्वंगु दु । थुगुसीया प्याखनय् श्यामसुन्दर म्यापा भैल व राजन प्रजापति लु भैल भैरव, निरोज प्रजापति न्हापांम्ह दागिं व नयन प्रजापति निम्हम्ह दागिं व सरगत प्रजापति ज्यापुंगचा जुयाः प्याखं क्यना वयाच्वनादीगु दु ।

धाः, भुस्याः, प्वंगा, म्वाय्लि आदि बाजंया तालय् क्यनीगु प्याखं धाःबाजंया ३० निसें ३२ गू तालय् प्याखं हुलेगु व थीथी त्वाः व द्यःया न्ह्यःने निगू व व स्वयां अप्वः तालय् क्यनेगु चलन दु । तान्त्रिक विधिपाखें मन्त्रोचारण यानाः पिथनीगु थ्व प्याखं क्वमचाःतले द्यः जुयाः प्याखं हुलीपिंसं सुयागुं चिप नये मजिउगु, नीसी जुयाः च्वनेमाःगु प्रावधान दु ।

प्राचीनकालय् थिमिइ भूत, प्रेत, पिशाचं दुःख बिउगुलिं उकिया निराकरण यायेत प्राचीनकालय् लाय्कू भैलःया रुपय् प्याखं क्यनेगु याना वयाच्वंगु व लिपा वनाः थुकियात जनस्तरं नं भैलः प्याखं पिथनाः भूत, प्रेत, पिशाच बिसिकेछ्वयेगु प्याखंया रुपय् क्यना वयाच्वंगु जनविश्वास दु ।

आर्थिक अभावया कारणं छगू इलय् तःदँ तक दिनाः झण्डै लोप जुइगु अवस्थाय् थ्यनेधुंकूगु थ्व प्याखं वंगु छुं दँ थुखे स्थानीय ल्याय्म्हतय् सक्रियताय् हाकनं क्यनेगु शुरु याःगु खः । प्याखं क्यनेगु निंतिं लछि न्ह्यःनिसें तयारी जुयाच्वंगु खःसा करिब बाःछि न्ह्यः देवगणं तान्त्रिक विधिकथं प्याखंया प्रशिक्षण शुरु याःगु खः ।