थःगु किपा खनाः थः हे दंग मोदी

येँ- नापं च्वंगु किपाय् खने दुम्ह मनू झीसं म्हसी मखु । छाय्धाःसां वय्कः नेपाःमि मखु। वय्कः खः भारतीय प्रधान– मन्त्री भाजु नरेन्द्र मोदी ।थःगु ६९ दँ बुन्हिया लसताय् पुलांपिं पासापिंसं छ्वया हःगु थःगु पुलांगु किपायात वय्कलं थःगु आधिकारिक फेसबुक मार्फत सार्वजनिक यानादीगु खः ।

लिसें वय्कलं थज्याःगु किपा मेपिं सुयाकें दुसा व नं छ्वया हजि धकाः आह्वान नं यानादीगु दु । थुखे नेपालय् धाःसा प्रधानमन्त्री केपी शर्मा ओलीं भारतीय प्रम मोदीयात बुन्हिया लसताय् बियादीगु भिंतुनाय् भाषाया विवाद पिहां वःगु दु । प्रम ओलीं मोदीयात अंग्रेजी, हिन्दी व मोदीया मांभाय् गुजरातीं भिंतुना सन्देश च्वयाः बिया छ्वःगु खः ।

मोदीं उकिया लागिं सुभाय् धकाः ओलीयात खस नेपाली भासं लिसः बिया हल ।थुकिं यानाः खस नेपाली पक्षधरतय्सं मोदीयात बिउगु भिंतुना पती खस नेपाली भाय् छाय् मछ्यला धकाः न्ह्यसः तया हःगु दु । थ्व पुचलं सामाजिक सञ्जालय् नं थज्याःगु न्ह्यसः तयाः ओलीया आलोचना याना हःगु खनेदु ।