पेट्रोल बचे यायेत वालय् निन्हु विदाया प्रस्ताव

येँ (नेपालभाषा टाइम्स)- नेपाल आयल निगमं सरकारयात पौ हे च्वयाः पेट्रोलियम पदार्थय् तयातःगु थीथी कथंया कर चीकेत माग याःगु दु । निगमं घाटा फये हे मफयेवं निगमया घाटा व्यवस्थापन व न्यूनीकरणय् सरकारं ग्वाहालि यायेमाः धासें उद्योग, वाणिज्य तथा आपूर्ति मन्त्रालययात पौ च्वःगु खः ।

निगमं च्वःगु पतिइ सरकारी बैंक, नागरिक लगानी कोष, सञ्चय कोष लिसेया संस्थापाखें निगमयात अःपुक ध्यबा उपलब्ध याकेमाःगु माग नं यानातःगु दु । पतिइ उकिया फुक्क व्यवस्था अर्थ मन्त्रालयं मिले यायेमाःगु खँ नं धयातःगु दु ।

निगमं पेट्रोलियम पदार्थ आयात यायेबलय् सरकारं कया वयाच्वंगु कर चीकेमाः धासें पतिइ न्ह्यथनातःगु दु, ‘सरकारं पेट्रोलियम पदार्थय् कया वयाच्वंगु भन्सार शुल्क, मूल्य अभिवृद्धि कर, पूर्वाधार कर लगायतया कर छुं ईया नितिं चीकेमाः, उकथं हे एलपी ग्यासय् कया वयाच्वंगु प्रति सिलिन्डर २०० तका नं चीकेमाः ।’

कर चीकेधुंकाः जुइगु घाटा धाःसा निगमं पेट्रोलियम पदार्थया भाः समायोजना यानाः पूर्ति यायेगु तयारी जुयाच्वंगु दु । उकथं हे पेट्रोलियम पदार्थया खपत म्हो यायेत अत्यावश्यक व संवेदनशील क्षेत्र व निकाय बाहेक नीजि व सरकारी साधन सञ्चालनय् जोरबिजोर प्रणाली लागू यायेमाःगु, पेट्रोलियम पदार्थं चले जुइगु सवारीया आयात निरुत्साहित यायेमाःगु, तःधंगु उद्योग, होटले थेज्याःगु क्षेत्रय् जुइगु पेट्रोलियम पदार्थया छ्यला क्वपाले माःगु माग नं सरकारयाके यानातःगु दु । निगमं पेट्रोलियम पदार्थ खपत म्हो यायेत वालय् निन्हु विदा बीमाःगु सुझाव नं सरकारयात बियातःगु दु ।

अथे हे निगमं पेट्रोलियम पदार्थया भाः थकायेमाःगु प्रस्ताव नं यानातःगु दु । न्हू थहां वंगु भाः कथं पेट्रोल प्रति लिटर १८३ कायम यायेमाःगु सुझाव यानातःगु दु । थौंकन्हय् निगमं पेट्रोल प्रतिलिटर १५५ तकां मियाच्वंगु दुसा ग्यास प्रति सिलिन्डर १५७५ तकां मियाच्वंगु दु । ग्यासया भाः नं थकयाः २२४० तका कायम यायेमाःगु माग याःगु दु ।
रुस व युक्रेन दथुइ जुयाच्वंगु युद्धया कारणं अन्तर्राष्ट्रिय बजारय् पेट्रोलियम पदार्थया भाः थहां वनाच्वंगु खः । युद्ध ताःहाकः जुया वना धाःसा पेट्रोलियम पदार्थया भाः अझ थहां वनेफइगु खँ धाःगु दु ।