थौं मदुम्ह पद्मरत्न तुलाधरया दकिला
येँ – नेवाः आन्दोलन लिसें आदिवासी जनजाति, मानव अधिकार आन्दोलनया न्ह्यलुवाः भाजु पद्मरत्न तुलाधर मदुगु थौं दछि क्यन । दछि न्ह्यः पाय्छि थौंया हे न्हि कुन्हु थापाथलीया नर्भिक अस्पतालय् वय्कः मदुगु खः । वय्कः मदुगु दुःखय् अबले नेपाल संवत् ११३९ न्हूदँया लसताय् जुइमाःगु सांस्कृतिक ¥याली समेत स्थगित जूवंगु खः ।
भाजु तुलाधरं तत्कालीन पञ्चायती व्यवस्था विरुद्ध वि.सं. २०४६ सालय् जूगु जनआन्दोलनय् विभिन्न कुचाय् विभाजित वामपन्थी पार्टीतय्त छथाय् तयाः वाममोर्चा गठन यायेगु लिसें नेपाली कांग्रेसलिसे जानाः संयुक्त आन्दोलन याकेगु ज्याय् महत्वपूर्ण भूमिका म्हितादीगु खः ।
अथे हे २०५२ सालय् तत्कालीन नेकपा (माओवादी) पाखें शुरु याःगु सशस्त्र जनयुद्धयात शान्तिवार्ता मार्फत समाधान यायेगु ज्याय् सहजकर्ताया भूमिका म्हितादीगु खः । अथे हे २०६२÷६३ सालय् तत्कालीन जुजु ज्ञानेन्द्र शाहया निरंकुश शासन विरुद्ध न्हय्गू राजनीतिक पार्टीतय्सं याःगु आन्दोलनं गति काये मफयाच्वंगु इलय् नागरिक आन्दोलन न्ह्याकाः जुजु विरुद्धया आन्दोलनयात ग्वाकेगु ज्याय् नं वय्कलं नेतृत्वकारी भूमिका म्हितादीगु खः ।
भाजु तुलाधरया दकिलाया सन्दर्भ लाकाः थीथी संघसंस्थातय्सं थीथी ज्याझ्वःत नं याइगु जूगु दु । थ्व झ्वलय् पद्मरत्न लुमन्ति गुथिपाखें थौं न्हिनय् २ः३० बजे थनया विशाल बजारस्थित सासा ब्यांक्वेटय् छगू लुमन्ति गोष्ठी यायेत्यंगु दु । ज्याझ्वलय् तुलाधरलिसे सतिक च्वनाः ज्या यानादीपिं थीथी व्यक्तिपिंसं सम्बोधन यानादी ।
अथेहे कन्हय् सुथय् ८ बजे थनया राष्ट्रिय सभागृहय् छगू ज्याझ्वःया दथुइ भाजु तुलाधरया जीवनी सफू ‘पद्मरत्न तुलाधर’ विमोचन जुइगु ग्वसाः दु । प्रकाशक च्वसापासा लिसें नेपालभाषा मंकाः खलः व न्हूदँ समारोह समिति जानाः याइगु ‘नेपाल संवत्या आन्दोलनय् पद्मरत्नया योगदान’ विषयक गोष्ठीइ उगु सफू नं विमोचन जुइत्यंगु खः ।
उकथं हे वय्कःया दकिला व न्हूदँ समेत लाकाः कन्हय् हे न्हिनय् १ बजे छगू ज्याझ्वःया दथुइ नेपालभाषा मंकाः खलःया दबूछेँ शिलान्यास याइगु ज्याझ्वः नं दु । थनया बिजेश्वरीइ च्वंगु मंकाः खलःया जग्गाय् येँ मनपाया मेयर विद्यासुन्दर शाक्यं दबूछेँया जग स्वनीगु ज्याझ्वः दु ।
LEAVE YOUR COMMENTS