चीनय् हाकनं कोरोना संक्रमण अप्वल

एजेन्सी- चीनय् हाकनं कोरोना संक्रमण अप्वयावःगु दु । चीनया सरकारी सञ्चार माध्यमया कथं छवाःया दुने चीनया ११ गू प्रान्तय् कोरोना भाइरस हाकनं खनेदुगु खः । चीनया अधिकारीतय्सं वइगु इलय् संक्रमण अझ अप्वया वनेफुगु व थप क्षेत्रय् नं महामारी खनेदइगु धाःगु दु ।

चीनया राष्ट्रिय स्वास्थ्य आयोगया प्रवक्ता मि फेङं बिउगु जानकारीकथं अक्टोबर १७ निसें ११ गू प्रान्तय् अन्तरक्षेत्रीय यात्रा लिपा संक्रमण खनेदुगु खः । प्रवक्ता फेङं महामारी खनेदुगु प्रान्तय् आपतकालीन उपाय छ्यलेत नं अपिल याःगु दु ।

कोरोना संक्रमण नियन्त्रण यायेत चीनया यातायात मन्त्रालयं गङसु व इनर मंगोलियाया छुं शहरय् बस व ट्याक्सी सेवा बन्द याःगु दु । अथे हे इनर मंगोलियाया एजिना लागाय् च्वपिं मनूतय्त सोमवाः निसें छेँय् नं पिहां मवयेत आदेश बिउगु दु ।

चीनया छम्ह वरिष्ठ स्वास्थ्य अधिकारीं चीनय् खनेदुगु डेल्टा भेरियन्टया कोरोना भाइरस विदेशं वःगु धाःगु दु । अथे हे चीनया महामारी विशेषज्ञतय्सं थ्व महामारी सन् २०२० य् वुहानय् खनेदुगु संक्रमण लिपा ग्यानापुगु जूगु धाःगु दु ।

वंगु छवाःया दुने चीनय् १३३ म्हेसित कोरोना खनेदुगु खः उकि मध्ये १०३ म्ह मेगु देशं वःपिं पर्यटक खः ।