प्रदेश प्रहरी नं सिडिओं चले याइगु

प्रदेश सरकारतपाखें प्रहरी ऐनया विरोध

येँ – देशय् संघीय व्यवस्था लागू जूसां केन्द्र व प्रदेश दथुइ ब्वलनेगु यानाच्वंगु विवाद हानं मेगु छगू मामिलाय् नं पिलू वःगु दु । ताःई न्ह्यवंनिसें विवादया विषय जुयाच्वंगु प्रदेश प्रहरीया खँय् थ्व कचवं पिहां वःगु खः । संविधान कथं प्रदेश सरकारतय्सं प्रदेश प्रहरी गठन याये फइगु खःसां थ्व प्रहरीयात सुनां सञ्चालन याइ व उमिगु ज्या छु जुइ धइगु खँय् ताः ई न्ह्यवंनिसें विवाद जुया वयाच्वंगु खः ।

अज्याःगु विवादया दथुइ आः नकतिनि संघया प्रतिनिधिसभां प्रदेश प्रहरीयात नं जिल्लाया सिडिओं सञ्चालन यायेगु व्यवस्था यासें प्रदेश ऐन पारित याःगु दु । प्रदेश प्रहरी नं केन्द्रया सिडिओं सञ्चालन याये फइगु व्यवस्था सहितया ऐन पारित जुइवं उकिया विरुद्ध थीथी प्रदेशया सरकारत थःगु बिचाःत तया हःगु दु ।

खास यानाः थीथी प्रदेशया गृह मामिला स्वइपिं मन्त्रीतय्सं थुकिया विरोध याना हःगु खः । प्रदेश नं. ३ या गृहमन्त्री शालिक राम जम्मरकट्टेलं प्रदेश सरकारलिसे छुं हे समन्वय मयासे प्रदेश प्रहरी सिडिओं परिचालन याये दइ कथं हःगु थ्व विधेयक थःपिंत स्वीकार्य मजुइगु खँ कनादीगु दु ।

सरकारं हःगु थ्व व्यवस्था वास्तवय् संघीयता विरोधी पलाः जूगु द्वपं नं वय्कलं बियादीगु दु । प्रदेश ३ य् संघया हे पार्टीया सरकार दु । उकथं हे प्रदेश २ या कानूनमन्त्री ज्ञानेन्द्र यादवं प्रहरी हे संघीय सरकारं चले यात धाःसा प्रदेश सरकारं थःगु प्रदेश दुनेया शान्ति सुरक्षा गय् यानाः कायम यायेगु धकाः न्ह्यसः तयादीगु दु ।

वय्कलं नं थुकियात संघीयताया मर्म अःखः वःगु ज्या धकाः आलोचना यानादीगु दु । प्रदेश प्रहरी गठन यायेगु ज्या याकनं याके बी माल धकाः प्रदेशतय्सं ताः ई न्ह्यवंनिसें माग याना वयाच्वंगु खः । संघीय सरकारं प्रहरी कानून पारित मयाःगु कारणं यानाः प्रदेश सरकारतय्सं थःगु प्रदेश प्रहरी गठन याये मफयाच्वंगु खः ।

मंकाः प्रतिरोधया तयारी
ताःई तकया सहलह लिपा अन्ततः सरकारं प्रदेश प्रहरीयात थःगु हे मातहत तयेगु ज्या याःगुलिं उकिया विरोधय् प्रदेश सरकारतय्सं मंकाः रूपं पलाः ल्ह्वनेगु तयारी यानाच्वंगु खँ सीदुगु दु । प्रदेश ३ या गृहमन्त्री शालिकराम जम्मरकट्टेलं सरकारया थ्व पलाः विरुद्ध थःपिंसं थःगु हे थासं प्रतिकार यायेगु खँ कनादीगु दु ।

यदि प्रदेश प्रहरी नं संघं हे परिचालन यात धाःसा अज्याःगु प्रहरीया छुं अर्थ मदइगु व प्रदेश सरकारया नं अर्थ दइ मखु धासें सरकारं पारित याःगु थ्व कानूनया मंकाः रुपं विरोध यायेमाःगु महसुस उमिसं याना हःगु खः । थुकिया विरोध गुकथं यानाः यायेगु धइगु खँय् प्रदेशतय् दथुइ अनौपचारिक खँल्हाबल्हा जुयाच्वंगु खँ नं धाःगु दु ।

सम्बन्धित बुखँ

LEAVE YOUR COMMENTS