ने. सं. ११४४ कौलाथ्व दशमी - स्याक्वत्याक्व

चीनं पित बिउगु न्हूगु नक्सा विवाद, प्रम दाहालं खँ ल्ह्वनीगु

येँ (नेपालभाषा टाइम्स)- चीनं नकतिनि जारी याःगु थःपिनि न्हूगु नक्साय् नेपाःया ‘चुच्चे नक्सा’ दुमथ्याकूगु खँयात कयाः प्रधानमन्त्री पुष्पकमल दाहालं थःगु चीन भ्रमणया झ्वलय् खँ तइगु जूगु दु । माओवादी केन्द्रं न्ह्याकेत्यंगु विशेष अभियानया सम्बन्धय् शुक्रवाः जूगु पत्रकार सम्मेलनय् न्ववासें प्रवक्ता अग्निप्रसाद सापकोटां नक्सा विवादबारे पार्टी अध्यक्ष लिसें प्रधानमन्त्री दाहालं कुटनैतिकढंगं खँ तइगु जानकारी बियादीगु खः ।

प्रवक्ता सापकोटां धयादिल, ‘चीनं थथे छाय् याःगु खः धयागु मसिउ । थुकियाबारे कुटनैतिक ढंगंं हल मालेमाः । झी प्रधानमन्त्री चीन भम्रणय् वनेत्यंगु दु । थ्व विषययात कयाः वय्कलं खँ तयादी । चुच्चे नक्सासम्बन्धय् पुलांगु सरकारं चीनयात नं जानकारी बिउगु दु । छु गथे जूगु खँ जिमिसं थुइकेगु कुतः यानाच्वनागु दु ।’

चीनं पितबिउगु न्हूगु नक्सायात कयाः थौंकन्हय् विवाद ब्वलनाच्वंगु दु । चीनया न्हूगु नक्साय् भारतया अरुणाचल प्रदेश, साउथ चाइना सीयात चीनय् दुथ्याकातःगु दु । थ्व नक्सायात कयाः भारत व फिलिपिन्सं असहमति प्वंकेधुंकूगु दुसा मलेसियां नं थःगु भूभाग चीनय् दुथ्याकाः नक्सा पित बिउगु धासें आपत्ति प्वंकूगु दु ।

‘साउथ चाइना सी’या थःपिनिगु लागायात नं चीनय् दुथ्याकाः न्हूगु नक्सा दयेकूगु धासें फिलिपिन्सं विरोध याःगु खः । फिलिपिन्सया विदेश मन्त्रालयं जारी याःगु वक्तव्यय् धयातःगु दु, ‘फिलिपिन्सया सार्वभौमसत्ताय् हय्कयाः सामुन्द्रिक क्षेत्रयात जबरजस्ती थःगु नक्साय् तयेगु चिनिया कुतः अन्तर्राष्ट्रिय कानुन अःखः खः । थ्व नक्सा जिमित स्वीकार्य मदु ।’

अथेहे भारतया विदेश मन्त्रालयं वंगु मंगलवाः औपचारिक रुपं विरोध यासें धाःगु दु, ‘गुगुं नं कथंया आधार मदयेक भारतया भूमि थःगु नक्साय् दुथ्याकूगु खँ भारतयात स्वीकार्य मदु । जिमिसं कुटनैतिक ढंगं थुकियात कयाः विरोध यायेगु जुइ ।’

उकथं हे मलेसियां नं चीनं यकःतिकथं नक्सा जारी याःगु धासें थःगु देय्या सार्वभौमिकताय् प्रहार जूगु खँ धाःगु दु । मलेसियाया विदेश मन्त्रालयया वक्तव्यय् धयातःगु दु, ‘चीनं यकःतिकथं जारी याःगु न्हूगु नक्सा जिमित स्वीकार्य मदु । जबरजस्ती नक्सा जारी यानाः चीनं मलेसियाया सार्वभौमिकता अस्वीकार याःगु दुसा सामुन्द्रिक क्षेत्रय् मलेसियाया सार्वभौम अधिकार हनन याःगु दु ।’

मेखे चीनं धाःसा न्हूगु नक्सा नियमित प्रक्रिया अन्तर्गत पिथनागु धासें सुयागुं सार्वभौमिकता हनन मयानागु धाःगु दु । चिनियाँ विदेश मन्त्रालयया प्रवक्ता वाङ वेनवीनं धाःगु दु, ‘जिमिसं कानुन सम्मत ढंगं नियमित प्रक्रिया अन्तर्गत नक्सा पिथनागु खः । जिमिसं सुयागु नं सार्वभौमिकता आक्रमण यानागु मदु । थ्व फुक्कं असन्तुष्टि व विरोध चीनयात विवादय् सालेगु प्रपञ्च जक खः ।’