पौडेल व स्थापितया ल्वापु पुलांगु
डोरमणियात असफल यानाः थः मुख्यमन्त्री जुइगु स्थापितया दाउ अःखः लात
येँ (नेपालभाषा टाइम्स)÷ प्रदेश नम्बर २ या मुख्यमन्त्री डोरमणि पौडेल व भौतिक पूर्वाधार मन्त्री केशव स्थापितया टकराव आः जक मखुसे केशव स्थापित महानगरपालिकाया मेयर जुयाच्वंगु इलं निसें जुयाच्वंगु खँ धाःगु दु । थुपिं निम्हेसिया न्हापांनिसें दयाच्वंगु ल्वापुया झ्वलय् हे मुख्यमन्त्री पौडेलं स्थापितयात मन्त्री पदं बर्खास्त याःगु खँ नेकपा सूत्रं धाःगु दु ।
२०५४ सालय् स्थानीय निर्वाचन जुइधुंकाः स्थापित येँ महानगरया मेयर जूगु खःसा पौडेल हेटौंडा नगरपालिकाया मेयर जूगु खः । उगु इलय् नेपाल नगरपालिका संघ गठन यायेगु झ्वलय् नं पौडेलं स्थापितयात बाइपास याःगु खँ धाःगु दु । स्थापितं उगु इलय्या तँ आःतकं मुख्यमन्त्री पौडेलयात प्वंकेगु यानाच्वंगु खँ धाःगु दु ।
प्रदेश ३ य् भौतिक पूर्वाधार मन्त्री जूम्ह स्थापितं प्रदेश सरकार गठन यायेत्यंबलय् मुख्यमन्त्रीया हे दावी यानाच्वंगु खः । तर पार्टी नेतृत्व थःगु पक्षय् मदुगुलिं तत्कालया निंतिं पौडेलयात मुख्यमन्त्री दयेकेगु व लिपा थः हे मुख्यमन्त्री जुइगु धकाः पार्टी दुनेया मेम्ह दावेदार जुयाच्वंम्ह अष्टलक्ष्मी शाक्ययात बुकेत विशेष भूमिका म्हितूगु खः ।
थ्वहे झ्वलय् स्थापितं वर्तमान मुख्यमन्त्री पौडेलयात असफल यानाः थः मुख्यमन्त्री जुइगु तयारी यानाच्वंगु खः । उकिं हे मन्त्रिपरिषदया बैठकय् तकं स्थापितं मुख्यमन्त्री पौडेलयात बेवास्ता यायेगु यानाच्वंगु खः । मन्त्रिपरिषदया बैठकय् स्थापितं संयमता मक्यँसे मुख्यमन्त्री पौडेलयात तकं थीथी द्वपं बीगु ज्या यानाच्वंगु खः ।
मुख्यमन्त्रीयात असफल यानाः चिइकेगु तयारी यानाच्वंम्ह स्थापितयात पार्टीया हाइकमाण्डं विश्वास यायेमफुगुलिं वय्कःया थ्व कुतः धाःसा पूवने मफयाच्वंगु खः । थ्वहे झ्वलय् मन्त्रिपरिषदया बैठकय् हे मुख्यमन्त्रीयात म्हुतु वायेवं अःखःबतं स्थापितयात हे बर्खास्त यानाहःगु खः ।
सूत्रया कथं स्थापितयात पदं चीकेगु ज्याय् नेकपा दुने दयाच्वंगु राजनीतिक गुटतय् नं उलि हे भूमिका दु । स्थापितं केपी ओली धाःगु बाहेक मेपिंसं धाःगु खँ तकं मन्यनीगु जुयाच्वन । अथे जूगुलिं नं स्थापितयात बर्खास्त यायेगु निंतिं मेमेगु गुटं मुख्यमन्त्री पौडेलयात ग्वाकाच्वंगु खँ सूत्रं धाःगु दु ।
LEAVE YOUR COMMENTS