स्वनिगलय् कोरोना परीक्षण अप्वयेकीगु

येँ (नेपालभाषा टाइम्स) – स्वनिगलय् कोरोना भाइरसया संक्रमण अप्वया वनेवं आः छठ पर्व क्वचायेवं स्वनिगलय् परीक्षण दर अप्वयेकेगु तयारी जुयाच्वंगु खँ सीदुगु दु । सरकारं निःशुल्क परीक्षण बन्द यायेवं स्वनिगलय् कोरोना संक्रमण अप्वया वनाच्वंगु खः । सर्वोच्च अदालतं कोरोना संक्रमण जूपिनिगु निःशुल्क वासः यायेत सरकारयात आदेश बीवं आः स्वनिगलय् परीक्षणया दायर अप्वयेका यंकेगु तयारी जुयाच्वंगु खँ स्वास्थ्य मन्त्रालयं धाःगु दु ।

स्वास्थ्य मन्त्रालयया कथं स्वनिगलय् न्हिथं परीक्षण यायेगु ज्या म्हो जुयाच्वंगु खःसा संक्रमण जूपिनिगु ल्याः धाःसा अप्वया वनाच्वंगु खः । स्वनिगलय् जक सक्रिय संक्रमित मध्ये ५० प्रतिशत स्वयां अप्वयाः वनाच्वंगुलिं आः परीक्षणया दायर अप्वयेकेगु तयारी जुयाच्वंगु खँ धाःगु दु । थौंकन्हय् न्हिं झिद्वः स्वयां अप्व परीक्षण यानाच्वंगु दुसा उकियात आः अप्वयेकेमाःगु माग जुयाच्वंगु खः । स्वनिगःया मेयर फोरम लिसे स्वास्थ्यविज्ञपिंसं स्वनिगलय् परीक्षणया दर अप्वयेकेमाःगु सुझाव सरकारयात बिया वयाच्वंगु खः । स्वनिगलय् स्वनिगः पिने झिं द्वलंद्वः मनूत दुहां वयेगु यानाच्वंगु दु । तर उमिगु परीक्षण जुइ फयाच्वंगु मदु । गुकिया लिच्वः स्वनिगलय् कोरोना संक्रमण अप्वया वनाच्वंगु विश्लेषण जुयाच्वंगु दु ।