विष्णु नाती फोटो पत्रकारिता सिरपाः लःल्हात

येँ(नेपालभाषा टाइम्स)- थुगुसीया विष्णु–नाती फोटो पत्रकारिता सिरपाः द हिमालयन टाइम्सया फोटो पत्रकार नरेश श्रेष्ठयात लःल्हाःगु दु । वरिष्ठ फोटो पत्रकार नातीकाजी महर्जन व वय्कःया जहान विष्णुदेवी महर्जनया नामं उगु सिरपाः नीस्वनादीगु खः ।

विष्णु–नाति फोटो पत्रकारिता सिरपाः गुथिया ग्वसालय् आइतवाः जूगु छगू ज्याझ्वःया दथुइ मूपाहां बागमति प्रदेशया संस्कृति, पर्यटन मन्त्री पुकार महर्जनं निगू दशक न्ह्यवंनिसें फोटो पत्रकारिताया ख्यलय् क्रियाशील फोटो पत्रकार श्रेष्ठयात उगु सिरपाः लःल्हाःगु खः । सिरपाःकथं वय्कःया दसिपौलिसें झिद्वः तका दां लःल्हाःगु खः ।

ज्याझ्वलय् नेवाः संस्कृति ल्याय्म्ह पुस्ताया दथुइ हस्तान्तरण यायेगु ल्याखं झिंखुदँ न्ह्यःनिसें धिमे बाजंया प्रशिक्षण बिया वयाच्वनादीम्ह सुनिता महर्जनयात हनेज्या नं याःगु खः ।

ज्याझ्वलय् नवासें मन्त्री महर्जनं समाजयात रुपान्तरण यायेगु ज्याय् फोटो पत्रकारतय् भूमिका नं महत्वपूर्ण जू धासें फोटो पत्रकारिता ख्यःयात राज्य नं ग्वाहालि यायेमाःगु विचाः तयादिल । लिसें वय्कलं छुं गुगुं ज्या याइपिंत दण्ड व पुरस्कारया व्यवस्था यायेमाः धासें गुगुं फोटों सुयात न्हिइकेगु व सुयात ख्वयेकेगु व गुलिं फोटों साहित्यया सिर्जना यानाच्वंगु दइ, उकिं हे किपा थः हे नवाइ धासें उकी ब्याख्या यानाच्वनेमाःगु आवश्यक मदु धयादिल ।

शम्भु मानन्धरया सभापतित्वय् जूगु ज्याझ्वलय् राससया नायब महाप्रबन्धक राजु शाक्य, वरिष्ठ फोटो पत्रकार गोपाल चित्रकार, पंचनारायण महर्जन, दाता नातीकाजी महर्जनं नुगःखँ तयादीगु खः ।

 

सम्बन्धित बुखँ

LEAVE YOUR COMMENTS