च्वखँ कासाय् उत्कृष्टपिंत सिरपाः लःल्हात

यल (नेपालभाषा टाइम्स)÷ बुद्ध जयन्तिया लसताय् लोटस रिसर्च सेन्टरया ग्व्सालय् जूगु ‘बुद्ध धर्म व विज्ञान ’ विषयया निबन्ध च्वज्या कासाय् उत्कृष्ट जूपिंत सिरपाः लःल्हाःगु दु । कासाय् न्हाप लाःम्ह सुनयना महर्जन (पद्मा गुरुमा) यात नगद झिंनिद्वः व दसिपौ, लिउ लाःम्ह चिनियाँ शाक्ययात नगद न्हय्द्वः व दसि पौ, लियांलिउ लाःम्ह रविन्द्र बज्राचार्ययात नगद प्यद्वः व दसिपौ उकथं हे कल्पना शाक्ययात सान्त्वनाकथं नगद निद्व व दसि पौ मू पाहाँ सुजाता गुरुमामं लःल्हानाबिज्याःगु खः । अथेहे प्रतियोगिताय् सहभागी जूपिं सकसितं दसि पौ लःल्हाःगु खः । ।

यलया सातोआकि इतो स्मृति भवनय् जूगु ज्याझ्वलय् न्ववानादिसें निबन्ध मूल्यांकनकर्ता डा.त्रिरत्न मानन्धरं थुगु निबन्ध प्रतियोगिताय् विज्ञानया मूवंगु तथ्य व तथ्याङ्क थाकुक्क मालास्वये म्वायेक हे निबन्ध च्वःपिं लेखकपिंसं न्ह्यब्वःगु खः कनादिल । विज्ञानय् परिक्षण याना स्वयेत प्रयोगशाला माःगुु प्रसंग न्ह्यथँसें नेपाःया छम्ह विद्वानं छगू ज्याझ्वलय् बुद्धधर्म विज्ञान सम्मत खःसा उकिया प्रयोगशाला गन ले धकाः न्यंगु न्ह्यसःया लिसः जुइकथं निवन्धया छम्ह लेखकं बुद्धं शरिरयातहे प्रयोगशाला कथं छ्यलाः पंचस्कन्धया परिक्षण यानाः धर्म ध्वाथुइकाबिज्याःगु खँ न्ह्यथना तयातःगु खँ कनादिल ।

ज्याझ्वलय् लसकुस न्वचू न्ह्यब्वयेगु झ्वलय् लोटस रिसर्च सेन्टरया मू छ्याञ्जे अशोक बज्राचार्यं कारणवश दिनाच्वंगु थज्याःगुु प्रतियोगिता आः वयाः निरन्तर न्ह्यानावनीगु खँ कंसे पुरस्कारदाता डा. गंगा शाक्ययात दुनुगलंनिसें साधुवाद देछायादिल ।

ज्याझ्वः लोटस रिसर्च सेन्टरया नायः डा. सुरेन्द्रमान बज्राचार्यया सभापतित्वय् जूगु खः ।