अनुगमनया नामय् खुद्रा व्यापारीयात आतंक

येँ – उद्योग वाणिज्य तथा आपूर्ति मन्त्रालयं स्वनिगःया थीथी खुद्रा पसलय् अनुगमनया नामय् व्यापारीतय्त आतंकित यानाच्वंगु द्वपं लाःगु दु। पसलय् मियातःगु सामानया अनुगमन यायेगु धकाः व्यापारीयात दुःख बियाच्वंगु द्वपं असंया खुद्रा व्यापारी लिसें साहित्यकार लाभरत्न तुलाधरं बियादीगु दु।

अनुगमनय् वइपिंसं काजु, पेस्टा बरां थेंज्याःगु ड्राइफुडय् तकं मिति तये माल धयाच्वंगु खँ कँसें वय्कलं धयादी, ‘थ्व मन्त्रालयया प्रचार यायेगु शैली जक खः, थुकिं खास हे बांलाःगु अनुगमन जुइ मखु।’म्हीग येँया नयाँ बजारय् नं अनुगमन वःगु इलय् छम्ह कस्मेटिक पसल्यां ग्यानाः पसः ती ला धकाः थःत फोन यानाहःगु खँ नं वय्कलं कनादिल।

अथे हे अनुगमनय् वइपिंसं मूल्यसुची अपडेट मयाः धकाः तकं दुःख बियाच्वंगु खँ व्यापारीतय्सं धाःगु दु। ‘खुद्रा पसल्यां न्हियान्हिथं थःगु सम्पूर्ण सामानया मूल्यसुची गय् यानाः अपडेट याये फइ?’ छम्ह व्यापारीं न्ह्यसः तयादिल।न्हापा पञ्चायतकालय् जक अञ्चलाधीश कार्यालयं थुकथं पसल्यातय्त दुःख बीगु खःसा आः लोकतन्त्र वयेधुंकाः नं सरकारं अज्याःगु हे दुःख बीगु याना हल धकाः नं पुलांपिं ब्यापारीतय्सं धयाहःगु दु।

खुद्रा व्यापार संघया अध्यक्ष पवित्र वज्राचार्यं न्याम्हेसिया पुचः दयेकाः न्यागू पुचलं स्वनिगलय् थीथी थासय् अनुगमन यानाच्वंगु जानकारी बियादीगु दु। थःपिं अनुगमनया विरोधी मखुसां अथे आतंकित यायेगु शैलीं सरकार वयाच्वंगु खँय् धाःसा वय्कलं आपत्ति पवंकादिल।

अनुगमनया नामय् असमान व्यवहार जुयाच्वंगु द्वपं नं वय्कलं बियादीगु दु। वय्कलं धयादी, ‘तःधंपिं व्यापारीयात अनुगमन यायेगु ज्या सरकारं यानाच्वंगु मदु। बजाः भाः थकाइपिं खुद्रा व्यापारी मखु, तःधंपिं व्यापारी खः, उकिं तःधंपिं व्यापारीयात निं न्हापां कारबाही यायेमाः, अले जक पाय्छि जुइ। खुद्रा व्यापारीं ला तःधंपिं व्यापारीं बियाहःगु सामानय् छुं प्रतिशत लबः नयाः मीपिं जक खः।’

वय्कःया कथं सरकारं न्ह्याक्व हे तःधंगु अनुगमन याना धाःसां आः तक तःधंगु डिष्ट्रिब्युटर्सतय्त थी फुगु मदुनि। भन्सारंनिसें कडा यायेगु खःसा खुद्रा पसलय् अनुगमन यायेमाःगु आवश्यकता हे मदइगु खँ नं वय्कलं कनादिल।