स्कुल चायेकेगु वा बन्द याकेगु खँय् थीथी निकायया थीथी हे धापू

येँ – कोरोना संक्रमण न्हियान्हिथं अप्वयाच्वंगु कारणं आः सञ्चालन जुयाच्वंगु स्कुलय् भौतिक उपस्थिति सहित आखः ब्वंकेगु ज्या बन्द यानाः अनलाइन वा मेगु विकल्पं शिक्षण यायेत तीव्र दबाब शुरु जूगु दु । तर सरकारं थुकिया बारे निर्णय मयाःगु कारणं यानाः शिक्षा, स्वास्थ्य आदि मन्त्रालयतय् फरक फरक धापू पिहां वयाः झन् तच्वःगु अन्यौल ब्वलंगु दु ।

येँया थीथी स्कुलय् समेत कोरोना संक्रमित विद्यार्थीत खने दयेवं चिन्तित जूपिं अभिभावकतय्सं भौतिक उपस्थिति सहित आखः ब्वंकेगु तुरुन्त बन्द यायेत इनाप यानाहःगु दु । अभिभावक संघया अध्यक्ष सुप्रभात भण्डारीं म्हिगः छगू पत्रकार सम्मेलन हे यासें विद्यार्थीतय् स्वास्थ्य तसकं जोखिमय् लाःगु कारणं आःया लागिं १ निसें ७ तगिं तकया कक्षा बन्द यानाः ८ निसें १० तगिं तकया कक्षा कडा स्वास्थ्य मापदण्ड लागू यानाः ब्वंकेत माग यानादीगु दु ।

म्हिगः च्वंगु राष्ट्रिय सभाया दिगो विकास तथा सुशासन समितिया बैठकय् नं स्कुलय् कोरोनाया विरामीत खने दयेधुंकाः तक नं स्कुल चायेकाः आखः ब्वंकाच्वन धकाः आलोचना यासें तत्काल स्कुल बन्द यानाः अनलाइन विधिं ब्वंकेत इनाप याःगु दु । उगु समितिइ न्ववानादीम्ह सांसद रमेशजंग रायमाझीं स्कुल बन्द यात धाःसा ध्यबा काये मखनी धकाः ग्यानाच्वंपिं प्याब्सन व एन प्याब्सनया दबाबय् लानाः शिक्षा मन्त्रालयं छुं निर्णय मफयाच्वंगु खः धकाः समेत द्वपं बियादिल । वय्कलं आः स्कुल बन्द मयायेगु खँय् आर्थिक चलखेल जुयाच्वंगु द्वपं बिसें डीएभी स्कुलय् स्वम्ह विद्यार्थीयात कारोना संक्रमण जूगु पुष्टि जुइधुंकूसां नं स्कुल बन्द मयाःगुलिं उगु स्कुलय् छानबिन यायेमाःगु प्रस्ताव समेत तयादिल ।

मेखे स्वास्थ्य मन्त्रालयं कारोनाया जोखिम अप्वयाच्वंगु धासें तत्कालया लागिं स्ववाः तक स्कुल बन्द यायेमाःगु सुझाव बीधुंकूगु दु । तर स्वास्थ्यं बिउगु उगु सुझावयात शिक्षा मन्त्रालयं लागू यानाच्वंगु मदु । शिक्षा मन्त्रालयं देय्न्यंकं छक्वलं स्कुल बन्द मयासे माःथाय् माःकथं बन्द याकेगु निर्णय स्थानीय तहयात बिउगु दु । तोखाय् ७ निसें स्कुल बन्द याइगु जूगु दु ।

उखे स्थानीय तह मध्ये नं येँ महानगरपालिकाया शिक्षा विभाग प्रमुख रामप्रसाद सुवेदीं म्हिगः छगू वक्तव्य जारी यासें यदि छुं नं स्कुलया विद्यार्थी, शिक्षक वा कर्मचारीयात कारोना खने दत धाःसा अन म्होतिं नं छवाः स्कुल बन्द यानाः वैकल्पिक माध्यमं पढाइ यायेत निर्देशन बिउगु दु ।

निजी स्कुलतय्गु संगठन प्याब्सनं धाःसा देय्न्यंकं छगू हे अवस्था जुयाच्वंगु मखु धासें सकभनं छक्वलं स्कुल बन्द मयासे गन आवश्यक जुल अन जक बन्द यायेत इनाप याःगु दु । मेगु संगठन एन–प्याब्सनं चाहिँ स्कुल बन्द यायेगु वा मयायेगु धयागु बारे थीथी निकायया थीथी धापू पिहां वःगुलिं झन् अन्यौल ब्वलन धकाः आलोचना याःगु दु ।

सम्बन्धित बुखँ

LEAVE YOUR COMMENTS