क्वहितिइ ज्याथःजिथिपिनिगु निंतिं धर्मदेशना

येँ(नेपालभाषा टाइम्स) – गुंला पर्वया इलय् लछियंकं न्ह्याइगु बहाः बही, विहारय् धर्मदेशनाया ज्याझ्वः न्ह्याइगु न्हूगु खँ मखु । गुंलाया हे इलय् लाकाः विद्युतीय संचारमाध्यमपाखें नं थुकथंया विशेष ज्याझ्वः न्ह्याकेगु याना वयाच्वंगु दु । लिपांगु इलय् त्वाः त्वालय् च्वंपिं ज्याथजिथिपिंत लक्षित यानाः नं थुकथंया ज्याझ्वः न्ह्याकेगु याना हयाच्वंगु दु ।

थ्व हे झ्वलय् थनया क्वःहितिइ नं जातक बाखनय् गुंला बौद्ध धर्मदेशना न्ह्यानाच्वंगु दु । क्वःहितिस्थित न्हापांगु पलाःया ग्वसालय् वंगु गुंलाथ्व दुतियानिसें छवाःयंकं थुगु ज्याझ्वः न्ह्यानाच्वंगु दु । उगु संस्थाया नायः शिला साय्मिया सक्रियताय् भजन न्ह्यब्वयेगु नापं धर्मदेशना ज्याझ्वः जुयाच्वंगु दु ।

विशेष यानाः ज्याथःजिथिपिंत लक्षित यानाः धर्मदेशना ज्याझ्वः न्ह्याका वयाच्वंगु खः । न्हिनसिया २ ताः इलंनिसें न्ह्यानाच्वंगु ज्याझ्वलय् नेपाल परम्परागत बौद्ध धर्म संघया गुरुजु, गुरुमांपिंसं धर्मदेशना बियाच्वनादीगु दु ।

वंगु भाद्र १ गते दकलय् न्हापां संघया अध्यक्षलिसें नांजाःम्ह बौद्ध विद्वान प्रा. डा. नरेशमान वज्राचार्यपाखें धर्मदेशना बियादिसें न्ह्याःगु ज्याझ्वलय् शान्तश्री रत्न बज्राचार्य, मञ्जुश्री रत्न वज्राचार्य, भीमरत्न वज्राचार्य, दीपेन्द्र वज्राचार्य, त्रिरत्न वज्राचार्य, गुरुमां रविता वज्राचार्यं धर्मदेशना बिया बिज्यायेधुंकूगु दु ।