ज्येष्ठ नागरिकया छेँय् ताम्रकार समाज
यल – ताम्रकार समाजपाखें ज्येष्ठ नागरिकयात इमिगु छेँय् हे वनाः नाप लायेगु नापं थीथीकथंया सेवा बिउगु दु । समाजया ज्येष्ठ नागरिक उपसमितिपाखें वंगु न्यादँ न्ह्यवंनिसें थुकथंया ज्याझ्वः न्ह्याका वयाच्वंगु खः । थ्व झ्वलय् समाज व उपसमितिया प्रतिनिधिपिं ज्येष्ठ नागरिकयात नापलायेत इमिगु छेँय् थ्यंकः वनाः थीथीकथंया सेवा नं उपलब्ध याकूगु खः ।
उगु इलय् समाजया प्रतिनिधिपिंसं ज्येष्ठ नागरिकया हालखबर न्यनेगु, इमिगु स्वास्थ्य परीक्षण यायेगु, सुखदुःखया खँ न्यनेगु–न्यंकेगु, समाज व दातापाखें ज्येष्ठ नागरिकया निंतिं उपलब्ध उपहार लःल्हायेगु ज्या जूगु खः ।
समाजपाखें वंगु न्यादँ न्ह्यवंनिसें थःगु समुदायया ज्येष्ठ नागरिकयात हालचाल थुइकेगु व इमित आवश्यक स्वास्थ्य सेवा उपलब्ध याकेगु उद्देश्यं न्ह्याका वयाच्वंगु थुकथंया ज्याझ्वःकथं थुगुसीइ न्हापांगु जंक्व सिधयेकादीम्ह ७८ दँ पूवने धुंकूपिं ९० म्ह ज्याथजिथिपिंत इमिगु छेँय् वनाः नाप लायेगु ज्या जूगु खः ।
समाज अन्तर्गतया उपसमितियात स्वास्थ्य, युवा तथा खेलकुद, धार्मिक क्रियाकलाप लगायत थीथी उपसमितिं ग्वाहालि याःगु खः ।
समाजया अध्यक्ष रविन्द्रराज ताम्रकारं द्यःया रुप धारण यायेधुंकूपिं ज्येष्ठ नागरिकया सम्मान याये खंगु थःगु व समाजया अहोभाग्य जूगु खँ कनादिल ।
समाजपाखें न्ह्याका वयाच्वंगु थीथी ज्याझ्वः स्वयां नं थुकथंया ज्याझ्वलं थःपिं अझ अप्वः आत्मसन्तुष्टि प्राप्त जूगु वय्कलं कनादिल ।
ज्याथजिथिपिंसं गबलें थःपिं थज्याःगु उमेरय् थ्यंकाः याकःचा जूगु महसुस यायेम्वाःलेमा धइगु ल्याखं समाजं थुकथंया ज्या न्ह्याका वयाच्वनागु स्पष्ट यानादिल ।
९० म्ह ज्येष्ठ नागरिकयात नाप लायेत इमिगु छेँय् थ्यंक हे वनेगु निंतिं खुगू पुचः दयेकाः वनागु जानकारी बियादिसें उपसमितिया संयोजक विजय ताम्रकारं समाजपाखें थुकथं छेँय्छेँय् वनाः नाप लायेगु व सेवा बीगु जक मखसे न्हापांगु ज्याजंक्व यानादीपिंत समाजया साधारणसभाय् हनेगु ज्या नं याना वयाच्वनागु धयादिल ।
LEAVE YOUR COMMENTS