ने. सं. ११४४ कौलाथ्व षष्ठी -

तौदह दुर्गन्धित, आपालं न्यासित

किपू(नेपालभाषा टाइम्स)- किपू नगरपालिका दुने लाःगु ऐतिहासिक व धार्मिक महत्वया तौदह पुखू लिपांगु इलय् दुर्गन्धित जुजुं वनाच्वंगु दु । पुखू दुर्गन्धित जुया वनाच्वंगु जक मखसे पुखुलिइ च्वंपिं आपालं न्या नं धमाधम सिनाच्वंगु दु ।

साउनया लिपांगु वाःपाखे स्वनिगलय् तसकं वा वःगुलिं तौदह पुखू नं दूषित जूगु खः । उगु इलय् स्वनिगलय् तसकं वा वयाः थाय्थासय् पुखू जूगु, डुबानय् लाःगु व खुसिया धाः नं तसकं बाः वःगु खः । थ्व हे झ्वलय् तसकं वा वयाः तौदह जःखःया धःया लः नं पुखुलिइ वंगुलिं पुखू दुर्गन्धित जूगुया नापनापं पुखुलिइ च्वंपिं न्या नं सीगु खः ।

तौदह धार्मिक व ऐतिहासिक ल्याखं महत्वं जाःगु पुखू खःसा आन्तरिक पर्यटनया केन्द्र नं खः । थनच्वंपिं न्या लिकाये मजिउगु जक मखु स्याये मजिउ व नये मजिउ धइगु धार्मिक मान्यता दया वयाच्वंगु दु । लिपांगु इलय् पुखू दुर्गन्धित जुइत थन लहिनातःपिं निद्वलं मल्याक न्या सीगु दु ।
तौदह व्यवस्थापन समितिं बिउगु जानकारीकथं पुखू जःखःया बुँइ ह्वलातःगु रासायनिक साः, होटल, रेष्टुरेन्ट व मेमेगु पसलं पिहां वइगु फोहर, चःबिया फोहर लः आदि धलय् वनीगु व बर्खां तसकं वा वइगु इलय् व हे धःया लः पुखुलिइ वनीगुलिं न्या सीगु खः । व्यवस्थापन समितियाकथं दँय्दसं तसकं वा वइगु इलय् पुखूया न्या सीगु यानाच्वंगु दु ।

बर्खां खुसि बाःलिसें वइगु फोहर तौदह पुखुलिइ वनीगु व विषाक्त लः पचे यायेगु क्षमता मदुपिं न्या अप्वः सीगु यानाच्वंगु समितिया सचिव राम आचार्यं कनादीगु दु । वय्कःया कथं रैथाने स्वयां नं ग्रास कार्प व सिल्भर कार्प प्रजातिया न्यायाके विषाक्त लः पचे यायेगु क्षमता मदुगुलिं सीगु व रैथाने न्या धाःसा खास हे मसी ।

बौद्ध धर्मावलम्बितय्सं धार्मिक भावना व मनोकामना पूरा जुइमा धइगु ल्याखं पुखुलिइ न्या त्वःतेगु यानाच्वंगु दु । थनया न्या स्याये मजिउगु, नये मजिउ मान्यता दुगुलिं नं पुखूया क्षमता स्वयां अप्वः न्या दुगु समितिं जानकारी बिउगु दु ।