प्रहरी दमनया भत्र्सना

येँ – गुथि विधेयक विरुद्ध जूगु शान्तिपूर्ण प्रदर्शनय् प्रहरीं याःगु दमनयात थीथी संघ संस्थां भत्र्सना याःगु दु । नेवाःतय् राष्ट्रिय संस्था नेवाः देय् दबुलिं म्हिगः छगू प्रेस विज्ञप्ति पिकासें प्रहरी दमनया विरोध याःगु दु ।

दबूया नायः नरेश ताम्रकारं हस्ताक्षर यानाः पिथंगु विज्ञप्तिइ शान्तिपूर्ण रुपं प्रदर्शन यानाच्वंपिं जनतायात प्रहरी अनावश्यक रुपं बल प्रयोग यानाः धरपकड याःगु व घाःपाः याःगु प्रति नेवाः देय् दबूया जातीय परिषद, गुथि, खलः पुचः, बिहार, बही, चपाया प्रतिनिधि व सरोकारवालाया बैठकं घोर भत्सर्ना याःगु दु ।

अथे हे आदिवासी जनजाति वकिलतय् संस्था लार्हुनिपं छगू प्रेस विज्ञप्ति पिकासें गुथि सम्बन्धी विधेयकय् दुगु प्रावधानं गुथि सम्पदा संस्कृति मदयेका छ्वइ धासें विधेयक विरुद्ध शान्तिपूर्ण प्रदर्शन याःपिंत प्रहरी दमन याःगुया निन्दा याःगु दु । संविधान प्रदत्त शान्तिपूर्ण प्रदर्शन यायेदइगु अधिकार कथं शान्तिपूर्ण प्रदर्शन याःपिंत आकाझाकां जूगु लाठिचार्ज व धरपकड प्रति थःपिनिगु गम्भीर ध्यानाकर्षण जूगु खँ वक्तव्यय् धयातःगु दु ।

लाहुर्निपया सचिव शंकर लिम्बुं हस्ताक्षर यानाः जारी याःगु प्रेस विज्ञप्तिइ राज्यया थज्याःगु क्रियाकलाप दिकाः शान्तिपूर्ण विरोध याये दइगु अधिकारया रक्षा यायेगु लिसें घाःपाः जूपिनि वासः यायेमाःगु व ज्वंपिंत तत्काल त्वःतेत नं माग यानातःगु दुु । उकथं हे नेवाः राजनीतिक अभियानं नं छगू प्रेस विज्ञप्ति पिकासें माइतीघर मण्डलाय् जूगु प्रहरी दमनयात विरोध प्वंकूगु दु ।

अभियानया नायः श्रीकृष्ण मानन्धरं विज्ञप्ति पिकासें दमनया भत्र्सना याःगु खः ।थ्वहे झ्वलय् नेवाः जागरण मञ्चया नायः सुजीव वज्राचार्यं छगू वक्तव्य जारी यासें गुथि विधेयक लगायत नेवाःतय्त वयाच्वंगु थीथी समस्या विरुद्ध आन्दोलन यायेत आः मंकाः मोर्चा दयेकाः सकलें छथाय् च्वनेमाःगु बिचाः तःगु दु ।