ख्वप नगरपालिकापाखें चिनियाँ पत्रकारतय्त लसकुस

ख्वप – ख्वप नगरपालिकाया ब्वनाय् वःपिं चिनिया पत्रकारतय् छगू प्रतिनिधिमण्डलयात तःजिक लसकुस याःगु दु । ख्वप नपाया ब्वनाय् वःपिं चिनिया समाचार समिति सिन्ह्वाया प्रतिनिधिमण्डलयात तःजिक लसकुस याःगु खः । चिनिया पत्रकारतय् प्रतिनिधिमण्डल वंगु मंगलवाः ख्वपय् थ्यंकः वःगु खः ।

उगु इलय् ख्वप नगरपालिकाया प्रमुख सुनील प्रजापतिलिसे चिनिया पत्रकारतय् प्रतिनिधिमण्डलं थीथी खँ ब्याकादीगु खः । नगरपालिकाया कार्यकक्षय् हे जूगु भेटघाटया इलय् नगर प्रमुख प्रजापतिं नेपाः व चीन निगू देय् भिंपिं जःलाखःला जूगु खँ न्ह्यथनादिसें नेपाः न्ह्याबलें नं चीन नीतिया पक्षय् दुगु खँ कनादिल ।

लिसें वय्कलं चीनया छगू देय निगू शासन पद्दतियात नेपालं तसकं सतिकं ध्यान बियाः स्वयाच्वनागु नं धयादिल । चिनिया राष्ट्रपति सी जिनपिङं न्ह्यब्वयादीगु ‘वान बेल्ट वन रोड’ ज्याझ्वः चीनया निंतिं जक मखसे संसारयात हे न्हूगु लँपु क्यनीगुकथंया योजना जूगु न्ह्यथनादिसें प्रमुख प्रजापतिं चिनिया राष्ट्रपतिं यानादीत्यंगु नेपाः भ्रमणं नेपाःमित उत्साहित जुयाच्वंगु खँ कनादिल ।

चिनिया पत्रकारतय् उगु प्रतिनिधिमण्डलं चीन सरकारया ग्वाहालिं न्ह्यानाच्वंगु येँया बसन्तपू लाय्कू लागाया नौतले देगःया नं अवलोकन याःगु खः । नेपाः व चीन दथुइ कला व संस्कृतिया आदान प्रदान यायेगु ज्या कलाकार अरनिकोपा पालय् झिंप्यंगूगु सदिंनिसें न्ह्याना वयाच्वंगु खय् चिनिया पत्रकारतय्सं लसता प्वंकादिल । उगु प्रतिनिधिमण्डलय् पाकिस्तान व हङकङय च्वनाः ज्या यानाच्वंपिं पत्रकारतय् सहभागिता दुगु खः ।