अमेरिकाय् सापारुया तयारी

येँ(नेपालभाषा टाइम्स)- अमेरिकाय् दँय्दसं थें थुगुसी नं सापारु नखः तःजिक हनेगु निंतिं तयारी शुरु जूगु दु । अमेरिकाय् च्वंपिं नेवाःतय्सं संस्था नेपाः पासा पुचः अमेरिकाय् (एनपीपीए)या ग्वसालय् सापारु हनेगु तयारी जुयाच्वंगु दु ।

एनपीपीएया ग्वसालय् वइगु गुंलागा दुतियाकुन्हु मेरिल्याण्डया सिल्भर स्प्रिंग सहरया ह्विटन पार्कय् सापारु नखः न्यायेकेगुत्यंगु दु ।
सापारुकुन्हु दछिया दुने मदुपिं थःथितिया लुमन्तिइ चिचिधिकःपिं मस्तय्त सा दयेकाः सायाः पिथनेगु चलन दुथें एनपीपीएपाखें नं उकथं हे मस्तय्त समाः यानाः सायाः पिथनाः चाःहिकेगु याना वयाच्वंगु दु ।

गुंलागा दुतियाकुन्हु सायाः पिथनेगु नापनापं घिन्तांघिसि, परम्परागत नेवाः बाजंलिसें सांस्कृतिक ब्वज्या यायेगु, मस्तय् निंतिं न्ह्यइपुक थीथी कासालिसें नेवाः नसा ज्वलंया नं व्यवस्था यायेगु ग्वसाः खलकं जानकारी बिउगु दु ।