नेपालभाषा पाठ्यक्रमयात कयाः सहलह

येँ (नेपालभाषा टाइम्स) – स्थानीय विषय नेपालभाषाया पाठ्यक्रम ‘येँ देय् म्हसिका’या बारे वंगु आइतबाः येँया सभागृहले शिक्षाविद्पिनि दथुइ छगू सहलह ज्याझ्वः जुल । येँ महानगरपालिका शिक्षा विभागया ग्वसालय् जूगु ज्याझ्वलय् छगू तगिं निसें च्यागू तगिंतकया स्थानीय विषय नेपालभाषाया पाठ्यक्रमया कार्यपत्र नेपाल आदर्श माविया पूर्व प्रधानाध्यापक बरुण प्रसाद बैद्यं न्ह्यब्वयादीगु खः । उगु कार्यपत्रय् मगाः मचाःगु खँ लुम्बिनी विश्व विद्यालयया पुलांम्ह कुलपति डा. त्रिरत्न मानन्धर, नेपालभाषा केन्द्रीय विभागया उपप्राध्यापक राजन लाल जोशींपिंसं तयादीगु न्ह्यसःया लिसः डा. चुन्दा बज्राचार्यं बियादीगु खः ।

शिक्षा काइपिं ब्वँमिपिंत सहज जुइकथं स्कूल पतिकं फरक फरक मजुइकेया नितिं व्याकरण व शब्दकोशय् एकरुपता हयेमाःगु खँय् डा. मानन्धरं बः बियादीगु दु। अथेहे कार्यपत्रय् योजना पक्ष व कार्यान्वयन पक्ष निगू दु। तर नखः चखः धयागु नसा त्वँसाया नितिं जक मखु उकिइ वैज्ञानिकता नं दुगुलिं पाठ्यक्रम नं वैज्ञानिकताया आधारय् तयार यायेगु कुतः जूगु खँ सकारात्म रुपं कायेमाःगु खँय् उप-प्राध्यापक जोशीं बः बियादीगु दु ।

प्रा. डा. चन्दा बज्राचार्यया संयोजकत्वय् बरुण प्रसाद बैद्य, मदन रत्न मानन्धर, नरेश वीर शाक्य, मोतीराज खनालपिंसं स्थानीय विषय नेपालभाषा पाठ्यक्रम निर्माण समितिया दुजः जुया ज्याझ्वः ताःलाकूगु ग्वसाः खलकं जानकारी ब्यूगु दु ।

सम्बन्धित बुखँ

LEAVE YOUR COMMENTS