रुपन्देहीया सैनामैनाय् बुद्धकालीन सभ्यताया अवशेष लुल

येँ- रुपन्देहीया सैनामैनाय् बुद्धकालीन सभ्यताया अवशेष लुया वःगु दु । सैनामैना नगरपालिका वडा नं. १ या थीथी थासय् बुद्धकालीन ईया अपा, ज्याभःलिसें पुरातात्विक महत्वया हलंज्वलं, जुजु लानि म्वःल्हुइगु बुंगाःचा लु वया वःगु दु ।
बुद्धकालीन ईया ऐतिहासिक व पुरातात्विक महत्वया हलंज्वलं लुया वयेवं आः उकिया संरक्षण यायेगु तातुनाः उगु हलंज्वलं लुया वःगु थासय्यात तारबारं घेरे यानाः संरक्षण यायेगु ज्या जुयाच्वंगु दु ।
ऐतिहासिक व पुरातात्विक ल्याखं महत्वपूर्ण बुद्धकालीन हलंज्वलं लुया वःसां माक्व प्रचार प्रसार मजुगुलिं ध्याकुनय् लानाच्वंगु उगु थासय् पुरातात्विक संग्रहालय तकं निर्माण यायेगु ज्या जुयाच्वंगु दु ।

सैनामैना नगरपालिकां वडा नं. १ स्थित सिरानटोल धइगु थासय् बुद्धकालीन ईया पुरातात्विक महत्वया सम्पदा संरक्षण व संवद्र्धन यायेगु निंतिं सैनामैना पुरातात्विक संग्रहालय तकं निर्माण यानाः बुद्धकालीन ईया मूर्ति लगायत मेमेगु हलंज्वलं संरक्षण याना वयाच्वंगु दु ।

नगरपालिकाया प्रमुख चित्रबहादुर कार्कीं बुद्धकालीन सभ्यताया हलंज्वलं संरक्षणया निंतिं वृहत रुपं गुरुयोजना दयेकाः ज्या यायेत स्वयाच्वनागु धयादिल । लिसें वय्कलं उत्खनन जुइ ल्यं दनिगु गुलिखे थासय् नं उत्खननया तयारी जुयाच्वंगु नं जानकारी बियादीगु दु ।

नगर प्रमुख कार्कीं संग्रहालयया निंतिं प्रदेश सरकारयाके बजेट माग यानागु धयादिसें म्होतिं नं ५० करोड आवश्यक जुइगु जानकारी वय्कलं बियादिल ।

उगु क्षेत्रया संरक्षण व संवद्र्धन यायेत सैनामैनाया ऐतिहासिक महत्व व लोकसंस्कृति संरक्षण समिति नं गठन याःगु दु । स्थानीय समाजसेवी झपेन्द्र जीसीया संयोजकत्वय् गठन याःगु समितिइ संस्कृतिविद प्रा. डा. गितु गिरी, रामप्रसाद भट्टराई लगायत सदस्यय् च्वनादीगु दुसा समितियात लछिया दुने छगू प्रतिवेदन तयार यायेत नं भाला बियातःगु दु ।

लुम्बिनी विकास कोष ऐन–२०४२ य् लुम्बिनी व खास छुं छुं थाय् बाहेकं मेमेगु थासय् बुद्धकालीन सभ्यता दु वा मदु धइगु विषयय् छुं स्पष्ट यानामतःगुलिं हे उगु थाय्यात बेवास्ता यायेगु ज्या जुयाच्वंगु सरोकारवालातय् धापू दु ।