मच्छिन्द्रं मोहन बगानलिसे म्हितीगु

येँ (नेपालभाषा टाइम्स)- नेपाःया मच्छिन्द्र क्लब एएफसी कप फुटबल धेंधेंबल्लाःया निगूगु चरणय् थ्यंगु दु । मंगलवाः जूगु कासाय् भुटानया पारो एफसी क्लबयात ३–२ गोलं बुकसें मच्छिन्द्र निगूगु चरणय् दुहां वनेत ताःलाःगु खः । मच्छिन्द्रं निगूगु कुतलय् एएफसी कपया निगूगु चरणय् वनेत ताःलाःगु खः । थगुने नं मच्छिन्द्रं हे एएफसी कप म्हितूगु खःसा उबलय् न्हापांगु चरणय् हे श्रीलंकाया क्लब ब्लुस्टारलिसे पराजित जूगु खः ।

शहीद स्मारक लिगया उपबिजेता जूसां मच्छिन्द्रयात एएफसी कप म्हितेगु ह्वःताः चूलाःगु खः । लिग बिजेता चर्च ब्वाइजयाके एएफसी क्लब लाइसेन्स मदुगुलिं मच्छिन्द्रं थ्व धेंधेंबल्लाखय् म्हितूगु खः ।

दशरथ रंगशालाय् जूगु कासाया न्हय्गूगु मिनेटय् हे मच्छिन्द्र छगू गोलं लिउने लाःगु खः । पारोया काजुओ होम्मां गोल यासें मच्छिन्द्रयात दबाबय् लाकूगु खःसां थ्वयां न्यागू मिनेट मवंनिबलय् हे विमल घर्तीमगरं गोल यासें मच्छिन्द्रयात बराबरीइ हःगु खः ।

एरिक विस्टया कर्नरय् वःगु बलयात आयुष घलानया पासय् विमलं हेडपाखें सुन्दर गोल याःगु खः । थ्वयां स्वंगू मिनेट लिपा हे घलानं थप छगू गोल यासें मच्छिन्द्रयात हाकनं अग्रता बिउगु खः । अथेहे कासाया ३९ औं मिनेटय् अफिज ओलावालें गोल यासें मच्छिन्द्रयात न्हापांगु हाफय् ३–१या अग्रता बिउगु खः ।

निगूगु हाफय् पारों छगू जक गोल यायेवं मच्छिन्द्र ३–२ गोलं त्याःगु खः । कासाया ७१ औं मिनेटय् पारोया निंतिं इभान्स अशान्तें गोल याःगु खः ।
आः मच्छिन्द्र साउन ३१ गेत भारतया मोहन बगानलिसे धेंधेंबल्लाः याइ । थ्व कासा त्याःगु टिमं बंगलादेशया ढाका अबहानी क्लब व माल्दिभ्सया क्लब इगल्स दथुया विजेता लिसे भदौ ५ गते धेंधेंबल्लाः याइ ।