संचारकःमि डंगोलया ह्याउँसिन्हः पिदन

येँ(नेपालभाषा टाइम्स)- नेपालभाषा संगीत ख्यलय् ताःई न्ह्यःनिसें क्रियाशील संचारकःमिलिसें निर्देशक राजेन्द्र डंगोलया ‘ह्याउँ सिन्हः’ नांया म्येँचाः पिहां वःगु दु । वंगु शनिवाः छगू ज्याझ्वःया दथुइ म्येँचाःलिसें उकी दुथ्याःगु छपु म्येँया म्युजिक भिडियो नं सार्वजनिक याःगु खः ।

मूपाहांकथं ख्यालिजुजु मदनकृष्ण श्रेष्ठं ज्याझ्वःया उलेज्या यासें म्येँचाःया पितब्वज्या यानादीगु खः । म्येँचालय् प्यपु म्येँ दुथ्यानाच्वंगु दु । प्यपुं म्येँ डंगोलं सः बियादीगु खःसा नातीकाजी महर्जनं च्वयादीगु खः । प्यपु म्येँमध्ये ‘चकना ए चकना’, ‘म्हुतुसिइ लिपिष्टिक बुलाः’ व ‘बांलाः आपालं’ म्येँ जुगल डंगोलं लसय् हनादीगु व संगीत संयोजन यानादीगु खःसा ‘अय्लाः छ धात्थें’ म्येँ गायक डंगोलं लसय् हनादीगु खःसा शिव शाहीं संगीत संयोजन यानादीगु खः । ‘म्हुतुसिइ लिपिष्टिक बुलाः’ म्येँय् निशा देसारं नं सः बियादीगु दु ।

उगु इलय् पितब्वज्या जूगु म्येँचालय् दुथ्याःगु ‘चकना ए चकना’या म्युजिक भिडियो नं सार्वजनिक याःगु खः । म्युजिक भिडियोय् नकतिनि जक मिस स्टार युनिभर्स–२०२३या उपाधी त्याकादीम्ह सृष्टि महर्जन, दिनकर महर्जनलिसें म्येँ हालामि डंगोलया अभिनय दुथ्यानाच्वंगु दु । रत्नदेवी महर्जनं निर्माण यानादीगु म्युजिक भिडियोया निर्देशन व कोरियोग्राफी रोहिया महर्जनं यानादीगु खःसा छाँयाकन राजेन्द्र डंगोल व सम्पादन इन्द्र मानन्धरं यानादीगु खः ।

डा. पंचनारायण डंगोलया सभापतित्वय् जूगु ज्याझ्वलय् म्येँ हालामि डंगोलया ‘झुमि यंकूगु समाज’ नांया सफू नं पितब्वज्या याःगु खः ।
ज्याझ्वलय् मूपाहां ख्यालिजुज श्रेष्ठ, विशेष पाहां वाद्य सम्राट न्हुछेबहादुर डंगोल, ज्यापु महागुथि नेपाःया नायः राजभाई जकःमि, संगीतकार डंगोल, कोरियोग्राफर महर्जन लगायतं नुगःखँ तयादीगु खः ।