न्याय थिके मजू धयागु अनुभूति याकेमाःगु दु – डंगोल
येँ(नेपालभाषा टाइम्स)- येँ महानगरपालिकाया उपप्रमुख सुनिता डंगोलं खँ ल्हानाः वा नवानाः मखु ज्या यानाः न्याय बीगु ज्या थिके मजू धइगु अनुभूति महानगरवासीयात याकेमाः धयादीगु दु । न्याय थिके मजू, सर्वसुलभ व सरल जू धइगु अनुभूति नागरिकयात याके माःगु वय्कलं धयादीगु दु ।
येँ महानगर न्यायिक समितिया संयोजक तकं जुयाच्वनादीम्ह उपप्रमुख डंगोलं राष्ट्रिय सभागृहय् वडा मिसा संजाल व मेलमिलापकर्तातय् निंतिं ग्वसाः ग्वःगु मेलमिलापसम्बन्धी महानगरपालिकाया कानूनी प्रबन्ध विषयक अभिमुखीकरण ज्याझ्वलय् नवासें उगु खँ धयादीगु खः ।
न्यायय् सकसिगुं पहुँच दयेमाःगु व थ्व दिगो विकासया सूचक नं खः धासें थ्व सुचकं वडास्तरीय न्यायिक क्रियाकलापयात संकेत नं यानाच्वंगु दु धयादिल । विवाद निरुपणया निंतिं विश्वव्यापाी रुपय् तताःजिकथंया अभ्यासत जूगु जानकारी बियादिसें उकीमध्ये मेलमिलाप हे दकलय् उपयुक्त व निगुलिं पक्षं चित्त बुझे याये फइगु विधि नं जूगु वय्कलं धयादिल । त्याः बूया प्रक्रिया फैसलाय् जूसां विवादया मा धाःसा कायम हे जुयाच्वनी धासें वय्कलं धयादिल, ‘महानगरया क्षेत्राधिकार दुने लाःगु दक्वं विवादयात वडाया निर्धारित कक्ष दुने च्वनाः मेलमिलापया माध्यमं निरुपण यायेगु हे झीगु योजना खः ।’
मेलमिलाप कक्षया वातावरणं तःधंगु भूमिका म्हितीगु विश्वास प्वंकादिसें वय्कलं मंकाःकथं या एकान्त वार्ता यायेगु थाय्या पूर्वाधारं मेलमिलापमैत्री जुइमाःगु खँय् नं वय्कलं बः बियादीगु दु ।
समितिया दुजःलिसें २९ वडाअध्यक्ष कुश ढकालं विवादया निगुलिं पक्षं थःपिं हे मिले जुइ धकाः गबलें नं धाइमखु तर मनमनं धाःसा सुनानं सहजीकरण याना बिउसा जिउ, छाय् ल्वापू ताःहाकयेका च्वनेगु धकाः विचाः यानाच्वंगु दइ । उकिं विवादया पक्षं चाहना यानाच्वंगुयात झीसं पूवंकेगु स्वयेमाः धयादिल ।
ज्याझ्वलय् अभिमुखीकरण मेलमिलाप केनद्र संचालन निर्देशिका व्यवस्था न्ह्यब्वयादिसें कानून तथा मानवअधिकार विभागया प्रमुख वसन्त आचार्यं जनप्रतिनिधि, संजालया संयोजक व दुजः, मेलमिलापकर्ता व कर्मचारीतय् मंकाः कुतलं हे मेलमिलापया वातारण तयार जुइ धयादिल ।
निर्देशिकाय् केन्द्र स्थापना, संचालन, केन्द्रया काम, कर्तव्य व अधिकार, केन्द्रया आधारभूत सुविधा, सेवा व्यवस्थापनया विषय न्ह्यथनातःगु दु ।
ज्याझ्वलय् मेलमिलापकर्ताया शुल्क पक्षपाखें काये जिउ कि मजिउ धइगु विषयय् सहलह जूगु इलय् महानगरं सुविधा बीगु जूगुलिं गुगुं नं पक्षपाखें शुल्क काये मजिउ धइगु सुझावयात नाला व मेलमिलाप जुइ मफुगुया प्रतिवेदन च्वयेबलय् नं निर्णय प्रक्रियाय् प्रभाव लाइगुलिं मच्वयेगु निर्णय याःगु दु ।
LEAVE YOUR COMMENTS