थिमिइ प्यन्हु तक भैलः व निलबाराही प्याखँ
थिमि (नेपालभाषा टाइम्स)÷ मध्यपुर थिमि नगरपालिका–८ बोडेय् म्हीग निसें बोडेया नांजाःगु निलबाराही प्याखँ पिकाःगु दु । दैवी शक्ति व तान्त्रिक विधि कथं स्वन्हु प्यचा तक निलबाराहीया द्यः प्याखँ हुइकेगु याइ । द्यः गणय् झिंगुम्ह द्यःपिं दुथ्याइसा बाजं थाइपिं यानाः सछि स्वयां अप्वः मनूत जात्राय् संलग्न जुइगु याइ ।
सापारुया कन्हय् कुन्हु चान्हय् द्यः छेँ नं द्यः पिहां विज्यायेधुंकाः न्ह्याइगु द्यः प्याखँ चछि थीथी त्वालय् प्याखँ हुइकेगु याइसा स्थानीय वासिन्दां म्हिगः सुथय् श्रद्धापूर्वक द्यः पुज्याःगु खः । मध्यपुर थिमि नगरपालिका–८ या वडा अध्यक्ष लिसे निलबाराही प्याखँ संरक्षक रमेश थापा श्रेष्ष्ठया चछि द्यः प्याखँ हुइकेगु ज्या क्वचायेवं स्थानीय वासिन्दा सुथय् फुक्कं द्यःयात पूजा याइगु । निलबाराही द्यःया प्याखँ तान्त्रिक शक्तिया आधारय् प्याखं हुइकेगु याय ।
उकथं हे मध्यपुर थिमि–७ नगदेशय् झिंनिदँ लिपा भैलाः प्याखँ पिकाःगु दु । भाद्र कृष्ण दुतिया निसे पञ्चमी तक प्यचा भैरव द्यः प्याखँ हुइकेगु चलन दु ।
भैलः प्याखँनय् न्हापा लिपा यानाः निम्ह भैरव, न्हापा व लिपा यानाः निम्ह दागीं व छम्ह ज्यापुया भेषय् प्याखँ हुलेगु याः । धाः, मुहाली लिसें थीथी बाजंया तालय् प्याखँ हुलेगु याइ । थुगु जात्राय् नं सछिम्ह स्वयां
अप्वः मनूत सक्रिय रुपं ब्वति कायेमाः ।
उकथं हे म्हीग चान्हय् मध्यपुर थिमि–५ पोबुत्वालं सलचा प्याखँ पिहां वःगु दु । प्यचा तक हुइकीगु प्याखँ भुलाखेल, दिगुत्वाः, बालकुमारी चपाचय् हुइकेगु याइ । मध्यपुर थिमि नगरया थीथी वडाय् प्यचा तका थुकथं थीथी द्यः प्याखँ हुइकेगु चलन दु ।
LEAVE YOUR COMMENTS