तोखाय् थीथी द्यःया देगः दनेत डीपीआरया नापजाँच

तोखा(नेपालभाषा टाइम्स)- तोखा नगरया ऐतिहासिक महत्वया धार्मिक सम्पदा पुनःनिर्माण याइगु जूगु दु । विशेष यानाः धार्मिक व सांस्कृतिक महत्वया देगः पुनःनिर्माणया निंतिं डीपीआरया नापजाँच यायेगु ज्या जूगु दु । पुरातत्व विभागं तोखाया ऐतिहासिक सम्पदा क्वथु गणेद्यः, नारांद्यः वंतुलि अजिमा (संकटा)या देगः पुनःनिर्माणया निंतिं डीपीआरया यायेत उकिया नापजाँच याःगु खः ।

सपन तीर्थ विकास समितिया अध्यक्षलिसें स्थानीय समाजसेवी व सम्पदा अभियन्ता देवराज डंगोलया कुतलय् विभागया प्राविधिकसहितया छगू पुचलं डीपीआरया निंतिं नापजाँच याःगु खः । उगु इलय् पुरातत्व विभागया आर्किटेक्ट इन्जिनियरया छगू पुचलं तोखा नगरपालिका २ वडाया वंतुलि अजिमा (संकटा), ३ वडास्थित क्वथु गणेद्यः व नारांद्यःया देगः पुनःनिर्माणया निंति. डीपीआर यायेत नाप जाँच याःगु खः ।

विभागया आर्किटेक्ट इन्जिनियर सुष्मा पाठक व आरती पोखरेल, तोखा नगरपालिका ३ वडाअध्यक्ष रमेश डंगोल, तोखा सांस्कृतिक संरक्षित क्षेत्र विकास समितिया अध्यक्ष गणेशमान श्रेष्ठ, नेवाः गुथि तोखाया अध्यक्ष रमेश नापित, संकटा मन्दिर गुथिया दुजः कृष्ण महर्जनलगायाय उपस्थिति दुगु खः ।

समितिया अध्यक्ष डंगोलं थुपिं स्वंगुलिं सम्पदाया डीपीआर तयार जुइधुंकाः मौलिक स्वरुप शैलीइ हे पुनःनिर्माण यायेगु जुइ धासें थ्व स्वयां न्ह्यः पुरातत्व विभाग, तोखा नगरपालिका, तोखाय् क्रियाशील थीथी राजनीतिक दललिसेया सहकार्यय् सपनतिर्थ देगः, चण्डेश्वर महाद्यःया देगः, चण्डेश्वरीया द्यःछेँ, थीथी परम्परागत फल्चा, सतःया पुनःनिर्माण सम्पन्न यायेधुंकूगु जानकारी बियादिल ।