किपुली दुःख बियाच्वंम्ह चिताधुँ ज्वन

येँ (नेपालभाषा टाइम्स)- ताः इलंनिसें त्रिविवि जःखः आतंक न्यंकाच्वंम्ह चिताधुँयात म्हिगः ज्वंगु दु । विश्वविद्यालयया लँ जुयाः बहनी व सुथ न्हापां वये वने याइपिं लँजुवाःतय्त आक्रमण याइम्ह चिताधुँयात त्रिवि सेवा आयोगया ज्याकू न्ह्यःने स्वतिपाँय् तयाः ज्वंगु खः ।

महानगरीय प्रहरी वृत्त किपूया प्रहरी नायब उपरीक्षक राजु लामाया कथं वंगु चैत २५ गते परिसरया प्रहरी सहायक निरीक्षकयात नं चिताधुँ आक्रमण याःगु खः । उकथं हे उगु चिताधुँ व छगः मोटरसाइकल लिसे ठक्कर नःगु खः ।

त्रिवि केन्द्रीय क्याम्पसया प्राचार्य ज्ञानेन्द्र राईया कथं वंगु दछि न्ह्यवंनिसें जनस्तर व त्रिवि कर्मचारीं चिताधुँया खतरा बारे खँ ल्ह्वनाच्वंगु खः । वयां लिपा वन्यजन्तु सम्बद्ध निकायं स्वतिपाँय् तःगु खः । उगु इलय् चिताधुँ स्वतिपाँचय् मलायेवं मेगु थासय् यंकूगु खःसां वंगु छुुं न्हिं न्ह्यः जक अन तःगु खः ।

त्रिवि चिताधुँया वये वनेगु यानाच्वंगु मू कारण धाःसा स्थानीय जनतां लाथेपाथे वांछ्वःगु फोहोरया कारण जूगु खँ किपूया स्थानीय वासिन्दां धाःगु दु । स्थानीय वासिन्दाया कथं सुनां नं मखंक लाथेपाथे फोहोर वाःगुलिं यानाः अन खिचात मुनेगु यानाच्वंगु व चिताधुँ खिचाया शिकार यायेगु कथं त्रिवि परिसरय् वयेगु यानाच्वंगु खँ नं धाःगु दु ।