झोलाय् तयातःगु स्कुल न्यायेत कलेजत बाध्य
येँ – न्हापा छकः ‘झोलाय् खोला’ धइगु खँ तसकं चर्चाय् वःगु खः । जलविद्युत आयोजना दयेकेगु धकाः लाइसेन्स कयाः दँदँ तक नं ज्या मन्ह्याकुसें च्वनाच्वंपिनि लाइसेन्स सरकारं खारेज यायेगु ज्या छगू इलय् याःगु खः । तर थौंकन्हय् धाःसा झोलाय् खोला ला मखु, स्कुल जुयाच्वंगु दु ।
नर्सरी निसें झिगू तगिं तक ब्वंकेगु लाइसेन्स कयातःपिंसं न अज्याःगु स्कुलय् चायेकाः ब्वंकेगु ज्या यानाच्वंगु दु, न त अन सरकारी अनुगमन हे जुयाच्वंगु दु । तर थुकिया लबः धाःसा यक्व जुयाच्वंगु दु । न्हापा प्लस टुया अनुमति कयातःपिंसं आः नर्सरीनिसें ब्वंकेमाःगु व्यवस्था दु ।
तर सम्बन्धित निकायं धाःसा प्लस टु जक ब्वंकाच्वंगु कलेजयात तत्काल बन्द या वा नर्सरी निसें ब्वंकि धकाः दबाब बियाच्वंगु दु । तर नर्सरीनिसें ब्वंकेगु निंतिं माःगु अनुमति धाःसा बियाच्वंगु मदु । नर्सरीनिसें झिगू तगिं तक ब्वंकेगु निंतिं छक्वलं अनुमति बीगु मयासे दकलय् न्हापां नर्सरी, अनं लिपा मेगु छगू कक्षाया अनुमति बीगु ज्या यानाच्वंगु खँ पीडित प्लस टु कलेजया व्यवस्थापनं धाःगु दु ।
थःगु नां कने चाहे मजूम्ह उम्ह व्यवस्थापकया कथं थःपिंसं प्लस टु चले यानागु हे २० दँ दयेधुंकल आः प्लस टुयात निरन्तरता बीगु खःसा नर्सरीनिसें झिगू तगिं तक ब्वंकेत अनुमति माः । तर छक्वलं अनुमति काये मखनेवं थःगु कलेज बन्द यायेगु वा नर्सरीनिसें १० तगिं तकया अनुमति कयातःपिनिगु स्कुल न्यायेगु बाहेक मेगु विकल्प मदु ।
झोलाय् च्वंगु स्कुल हे न्याये धकाः कुतः यानागु खःसां अज्याःगु स्कुलयात २० निसें ३० लाख तका माग यानाच्वंगु दु । उकिं आः चले जुयाच्वंगु कलेज बन्द यायेगु बाहेक मेगु विकल्प मदुगु खँ वय्कलं कनादिल ।न्हापा प्लस टु जक चायेकूगु येँया आपालं कलेजं आः वयाः झोलाया स्कुल न्यानाः हे चले यानाच्वंगु खँ नं वय्कलं कनादीगु दु ।
स्कुल चले यायेगु निंतिं सम्बन्धित निकाययाकेअनुमति काः वंबलय् दर्ता जुयाच्वंगु स्कुल न्यायेत सुझाव बिउगु खँ कनादिसें वय्कलं अज्याःगु स्कुल मन्यायेगु खःसा आपालं प्लस टु अनुमति कयातःगु कलेजत बन्द जुइगु दावी नं यानादिल ।
झोलाय् च्वंगु स्कुल आपालं धइथें न्हापा जिल्ला शिक्षा कार्यालयया कर्मचारीया थःथितिपिंसं दर्ता यानातःगु खः । उमिसं हे आः प्लस टु कलेजयात झोलाय् च्वंगु स्कुल न्यायेमाल धकाः दबाब बियाच्वंगु दावी नं उम्ह व्यवस्थापकं यानादीगु दु ।
LEAVE YOUR COMMENTS