द्रुतमार्गं ख्वनाय् लिच्वः लाइमखु

शहरी विकास मन्त्री व प्रधानमन्त्रीया जहानपाखें रुद्रायणी दर्शन

यल (नेपालभाषा टाइम्स) – शहरी विकास मन्त्री कृष्णगोपाल श्रेष्ठं ख्वना व बुंगया छुं नं सम्पदायात लिच्वः मलाइकथं येँ-तराई द्रूतमार्ग (फास्ट ट्य्राक) दयेकेगु खँ धयादीगु दु । म्हिगः प्रधानमन्त्री केपी शर्मा ओलीया जहान राधिका शाक्य लिसें ख्वनाया नांजाःगु ऐतिहासिक रुद्रायणी द्यः दर्शन यायेगु व सकिमिला पुन्हिकुन्हु जुइगु द्यःप्याखं स्वयेत ख्वना झाःम्ह मन्त्री श्रेष्ठं थ्व खँ धयादीगु खः । द्यः दर्शनया झ्वलय् प्रधानमन्त्री ओलीया जहान शाक्यं नं सरकार ख्वनाय् छुं लिच्वः मलाइकथं फास्ट ट्य्राक दयेकीगु आश्वासन बियादीगु खः ।

वि.सं २०७२ सालया तःभुखाचं क्षतिग्रस्त रुद्रायणी देगःया अवलोकन यासें मन्त्री श्रेष्ठं देगः क्षतिग्रस्त जूगु तसकं चिन्ताजनक जूगु धासें थ्व देगः पुनःनिर्माणया निंतिं तुरुन्त हे निर्देशन बीगु खँ धयादीगु खः । वय्कलं सलंसःदँ पुलांगु ख्वनाया मेमेगु सम्पदा संस्कृति संरक्षणया निंतिं सरकारं माःगु फुक्क कथंया ग्वाहालि याइगु खँ नं धयादीगु खः ।

थ्व झ्वलय् मन्त्री श्रेष्ठ व क्ययात स्थानीय दू्रतमार्ग पीडितपिनि पाखें नेपाल डंगोलं फास्ट ट्य्राकया कारणं जुयाच्वंगु समस्यायात कयाः ध्यानाकर्षण पौ लःल्हाःगु खः । मन्त्री श्रेष्ठ व प्रधानमन्त्रीया जहान शाक्य लिसें राष्ट्रिय पुनःनिर्माण प्राधिकरणया प्रमुख कार्यकारी अधिकृत सुशील ज्ञवाली, पुरातत्व विभागया महानिर्देशक दामोदर गौतम, संस्कृति, पर्यटन तथा नागरिक उड्डयन मन्त्रालयया उच्च अधिकारीपिं नं ख्वना थ्यंगु खः ।

विभागया महानिर्देशक गौतमं न्हय्गूगु शताब्दीनिसें हे इतिहास क्वबिया वयाच्वंगु ख्वनाय् गुरुयोजना दयेकाः हे सम्पदा संरक्षण यायेमाःगु खँ धयादिसें रुद्रायणी देगःया पुनःनिर्माण जुइगु खँ धयादीगु खः । थ्व झ्वलय् वय्कलं थनया निजी व सार्वजनिक छेँ दयेकेबलय् सिमेन्ट छ्यलाः ढलान यानाः दयेकेगु मयासे परम्परागत सामग्री छ्यलाः दयेकेमाःगु खँ धयादीगु खः ।