ताम्रकार आगंछेँ पुनःनिर्माण क्वचाल

येँ( येँ महानगरपालिका २० वडास्थित मरु त्वालय् च्वंगु ताम्राकार आगंछेँ पुनःनिर्माण क्वचाःगु दु । येँ महानगरपालिकाया प्रमुख विद्यासुन्दर शाक्यं पुनःनिर्मित आगंछेँया उलेज्या यानादीगु खः ।

आगंछेँ उलेज्या लिपा येँ महानगर प्रमुख शाक्यं गुथियारतय्सं कःघाना वयाच्वंगु परम्परायात सरकारंपाखें ग्वाहालि याना वयाच्वनागु खँ कनादिल । वय्कलं सम्पदा ल्यंकेत जनस्तरं वःगु दक्वं मागयात ग्रहण यानाः उकिया मर्मत, सम्भार, जिर्णोद्वार व पुनःनिर्माणय् महानगरं लगानी याना वयाच्वंगु धयादिल ।

‘हिला वंगु ईलिसें बजाः भाः नं थहां वनाच्वंगुलिं पुर्खानिसें चले जुया वयाच्वंगु परम्परा कःघायेत व न्ह्याकेत हे थाकुया वयाच्वंगु इलय् थःपिंसं राज्ययापाखें सहभागिता क्यना वयाच्वनागु दु’, वय्कलं धयादिल ।

वडाअध्यक्ष राजेन्द्र मानन्धरं २० वडा धइगु सम्पदां जायाच्वंगु क्षेत्र खः धासें येँ देय्यात म्हसीकीगु मरुसतः नं थ्व हे वडा दुने लाः धयादिल । वय्कलं सेवा सुविधा वितरण व सम्पदा संरक्षण यायेगु हे वडाया प्राथमिक योजना जूगु खँ कनादिल ।

२०७७ फागुन ७ गते स्थानीय उपभोक्ता समितिलिसें जूगु सम्झौताकथं पुनःनिर्माण सम्पन्न जूगु आगंछेँ स्वतँजाःया खः। नेवाः समाजय् आगंछेँय् मूलरुपं शक्तिया पुजा याइगु आगंछेँय् मरु त्वाः जःखःया झिंच्याखलः ताम्राकारतय्सं नित्य पुजा लिसें मोहनिया इलय् विशेष पुजा यायेगु याना वयाच्वंगु दु ।