सक्व मेलाया ल्याःचाः सार्वजनिक

सक्व(नेपालभाषा टाइम्स)- वंगु माघ लछियंकं जूगु श्री माधवनारायण स्वस्थानी वूत तथा शालीनदी मेलाया ल्याःचाः सार्वजनिक याःगु दु । श्री माधब नारायण स्वस्थानी व्रत तथा शालिनदि सुधार समितिं लछियंकंया मेलाया झ्वलय् थीथी संघसंस्थापाखें प्राप्त आर्थिक व भौतिक ग्वाहालिया ल्याःचाः सार्वजनिक याःगु खः ।

ज्याझ्वलय् नवासें शंखरापुर सक्व नगरपालिकाया प्रमुख रमेश नापितं नगर दुनेया धार्मिक, सांस्कृतिक सम्पदा संरक्षण नापं वज्रयोगिनी, इन्द्रायणी, सलम्बु लगायतया धार्मिकस्थलयात पर्यटकीय गन्तव्य दयेकेगु प्रतिवद्धता प्वंकादिल ।

पुलांम्ह नगर प्रमुख सुवर्ण श्रेष्ठ, समितिया नायः बालकृष्ण श्रेष्ठ, महासचिव योगेशमान डंगोललिसें थीथी व्यक्तिपिंसं नुगःखँ तयादीगु खःसा मेलायात थीथीकथं ग्वाहालि याःगु प्रहरी, स्काउट, मिसा पुचः ट्राफिक प्रहरीलिसें संघसंस्था, निकाय व व्यक्तियात सुभाय् पौ नं लःल्हाःगु खः । ज्याझ्वलय् उपप्रमुख समिता श्रेष्ठ, थीथी वडाया वडाअध्यक्ष, सदस्य व समितिया पुलांपिं नायःपिनिगु नं उपस्थिति दुगु खः ।