सक्वय् पद्मरत्नया अभिनन्दन व साहित्यिक सांस्कृतिक ज्याझ्वः

सक्व – भाषिक, आदिवासी जनजाति, नागरिक आन्दोलन नापं मानवअधिकारवादी न्ह्यलुवा पद्मरत्न तुलाधरयात सक्वय् नं छगू तःजिगु ज्याझ्वःया दथुइ हनेज्या याःगु दु । लिसें वय्कःया ज्याःजंक्वया लसताय् छगू तःजिगु साहित्यिक सांस्कृतिक ज्याझ्वः नं जूगु खः । उगु ज्याझ्वः सक्व कृषि फार्मया ग्वसालय् सक्व सभाहलय् ई. राजदास श्रेष्ठया सभापतित्वय् जूगु खः ।

भाषा, साहित्य व राजनीतिक ख्यलय् अतिकं चर्चितम्ह व्यक्तित्व भाजु तुलाधरया ज्याजंक्वया लसताय् जूगु ज्याझ्वलय् भाषिक न्ह्यलवा नरेशवीर शाक्य मूपाहांकथं झायादीगु खः । ज्याझ्वलय् नेपालभाषा व नेवाः जातिया संरक्षणया ज्याय् पला न्ह्याका वने फयेमा धइगु ताःतुनाः ज्याझ्वःया सभापति श्रेष्ठं भिंतुना पुचःयात न्याद्वः तका दां व हनापौ नं लःल्हानादीगु खः ।

ज्याझ्वः थःगु नुगःखँ तयेगु झ्वलय् भाजु तुलाधरं खलः, पुचःया नां वा मनूया नां जक नेवाः नां नयेवं न त नेवाःत म्वाना च्वने फइ न त नेवाः भाय् हे म्वाइ धासें यदि धाथें नेवाःतय्त म्वाका तयेगु खः धइगु जूसा नेवाः भाय् हे ल्यंका तयेमाःगु खँय् बः बियादिल । लिसें वय्कलं नेवाःतय्सं नेवाः भाय् ल्हायेमाःगु व भाय् मसःसा सयेकेमाःगु खँय् नं बः बियादिल ।

ज्याझ्वलय् पाहाकथं झायादीपिं सुरेश किरण, किरण शाक्य, यचु जोशी कान्छा तिवारी, कुञ्ज जोशी लगायत थीथी व्यक्तित्वपिंसं नं थःथःगु नुगःखँ तयादीगु खःसा सूर्जनारायण श्रेष्ठं सुभाय् देछानादीगु खः ।