कपिलवस्तु, रुपन्देही व बर्दियाय् १३म्हेसित कोरोना, संक्रमितत १३४म्ह थ्यन

येँ – नेपालय् हानं १३म्हेसित कोरोना भाइरसया संक्रमण खनेदुगु दु । कपिलवस्तुइ ६म्ह, रुपन्देहीइ ६म्ह व लुम्बिनीइ १म्ह यानाः १३म्हेसित संक्रमण जूगु खः ।

थौं सुथय् जक १०म्हेसित कोरोना संक्रमण जूगु कपिलवस्तपुइ हानं ६म्हेसित कोरोना भाइरसया संक्रमणया पुष्टि जूगु दु । कपिलवस्तुया यशोधरा गाँउपालिका–८ व बुद्धभुमि नगरपालिका–७य् च्वनीपि १५, १९, २३, ३०, ३२ व ३८ दँया मिजंत संक्रमण जूगु दु ।

अथेहे रुपन्देही समरीमाई गाँउपालिका–७ व लुम्बिनी सांस्कृतिक गाँउपालिका–६या २४, २६, २७, ३०, ३२ व ४०दँया मिजंतय्त संक्रमणया पुष्टि जूगु खः । नापं बर्दिया राजापुर–५या ११दँया मिसायात संक्रमण जूगु खँ स्वास्थ्य तथा जनसंख्या मन्त्रालयया सह–प्रवत्ता डा समिरकुमार अधिकारी जानकारी बियादीगु दु । बर्दियाय् काेराेना खनेदुगु थ्व न्हापांगु संक्रमण खः ।

येँया राष्ट्रिय जनस्वास्थ्य प्रयोगशालाय् याःगु परीक्षणया झ्वलय् झिंस्वम्हेसियां रिपोर्ट पोजेटिभ वःगु खः । थ्व नापं नेपालय् संक्रमिततय् ल्याः १३४म्ह थ्यंगु दु । थौं छन्हुया दुने हे २४म्हेसित संक्रमण जूगु दु ।