पासा पुचः गुथि लन्दनया न्हूधाः

येँ (नेपालभाषा टाइम्स)- पासा पुचः गुथि युके लन्दनया न्हूगु ज्यासना पुचः ल्यःगु दु । वंगु शनिवाः जूगु गुथिया नीस्वक्वःगु साधारण सभां २०२२–२०२४ या ज्यासना पुचःयात बिदाइ यासें सन् २०२४– २०२६ या निंतिं न्हूगु ज्यासना पुचः ल्यःगु खः ।

साधारण सभाय् छ्याञ्जे लिसा दली श्रेष्ठं २०२२–२०२४ या ज्यासना पुचःपाखें याःगु झिंछगू ज्याझ्वःया प्रतिवेदन न्ह्यब्वसें थुपिं ज्याझ्वलय् द्वःछिम्हं मल्याक मनूत सहभागी जूगु खँ कनादिल । अथेहे न्हूम्ह दांभरिं मन्दिरा मानन्धरयात ल्याःचाः लःल्हाःगु खःसा निर्वतमान नायः रुकमणि मानन्धरं थःगु कार्यकालय् ग्वाहालि यानादीपिं ज्यासना पुचःया दुजः, सल्लाहकार, दुजःपिंत सुभाय् देछायादीगु खः ।

थ्व लिपा संस्थापक दुजः अमृत रत्न स्थापिना, पुलांम्ह नायः डा. सचेतन तुलाधर व पासा पुचः गुथि युकेया अध्यक्ष सुशील प्रजापतिपिनि निर्वाचन कमिटीं रुकमणि मानन्धरया हे अध्यक्षताय् नीम्ह दुजः दुगु न्हूगु ज्यासना पुचः ल्यःगु खः । न्हूगु ज्यासना पुचलय् न्वकु ओजेस सिंह, छ्याञ्जे लिसा दली श्रेष्ठ, दांभरि मन्दिरा महर्जन, ल्यूदांभरिं पब्लिका श्रेष्ठ, सांस्कृतिक छ्याञ्जे आस्था जोशी बाटाजु, ल्यू छ्याञ्जे अमिता श्रेष्ठया ल्यःगु खःसा मू दुजलय् सन्दिप तुलाधर, प्रिति खड्गी शाही, दिनेश तुलाधर, निशा दली श्रेष्ठ, प्रमोद मानन्धर, रबिन्द्र जोशी, सन्नी शाही, विल्सन महर्जन, सुमन महर्जन, मनिराजा महर्जन, आशुतोष कक्षपति, रुपेश महर्जन, सन्दिपा तुलाधरयात ल्यःगु खः ।