एमालें छाय् फ्वंगु प्रमया राजीनामा
येँ (नेपालभाषा टाइम्स)÷छगू चीधंगु कार्यक्रमय् न्ववाःगु खँयात आधार दयेकाः एमालें प्रधानमन्त्री पुष्प कमल दाहालया राजीनामा फ्वनाच्वंगु दु । तर एमालें थ्व इलय् वयाः प्रम दाहालया राजीनामा छाय् फ्वनाच्वन ? थ्व खँयात कयाः नं चर्चा परिचर्चा शुरु जूुगु दु ।
प्रधानमन्त्री दाहालं थौंकन्हय् थीथी काण्ड सम्बन्धी भ्रष्टाचारया फाइल चायेकेगु यानाच्वंगु दु । थौंकन्हय् ललिता निवासया फाइल चायेकाः कारवाहीया पलाः न्ह्याकाच्वंगु दु । थुकी एमालेया नं छुं विशिष्ट नेतातय्गु ल्हाः दु धकाः चर्चा जुयाच्वंगु दु ।
अथे हे सरकारं छुं ई न्ह्यः तिनि नक्कली शरणार्थी काण्डया फाइल चायेकाः धमाधम तःधीपिं न्या ज्वनेगु शुरु याना हःगु दु । थुकी एमालेया वरिष्ठ नेतात लानाच्वंगु दुसा अझ मेपिं नं लाये फइगु अनुमान जुयाच्वंगु दु । थज्याःगु इलय् एमालें प्रधानमन्त्रीया राजीनामा फ्वनाः आन्दोलन याःगु धइगु आः थः मेपिं नेतातय्त नं कारवाही याइगु खः लाकि धइगु ग्याःचिकुं यानाः खः लाकि धकाः अनुमान याना हःगु दु ।
थथे थीथी भ्रष्टाचारया फाइल चायेकाः धमाधम कारवाही यानाः छुं भचा लोकप्रिय जुयाच्वंगु सरकारयात थथे राजीनामा हे यायेमाः धकाः एमालें यानाच्वंगु मागयात मेपिं विपक्षीतय्सं तक साथ धाःसा मबियाच्वंगु खँ सीदुुगु दु । एमालेयात साथ बीत मेगु पार्टीतय्त थाकुयाच्वंगु खँ धाःगु दु ।
प्रमयात गठबन्धनया साथ
प्रतिपक्षी नेकपा (एमालें) राजीनामा फ्वनाच्वंगु सन्दर्भय् प्रधानमन्त्री पुष्पकमल दाहालयात सत्ता गठबन्धनया दलतय्सं पूर्ण रुपं साथ बिउगु दु । सत्तारुढ गठबन्धनं एमालेपाखें यानाच्वंगु थ्व विरोध असंसदीय खः धासें प्रम दाहालं छुं नं हालतय् राजीनामा बीम्वाः धकाः अडान काःगु दु ।
प्रम दाहालं प्रितम सिंह नांया सिख व्यवसायीया सफू विमोचन यायेगु झ्वलय् प्रितम सिंह थःत प्रधानमन्त्री दयेकेमाः धकाः तःक्वः न्हू दिल्ली वंगु धकाः न्ववाःगु खँयात आधार दयेकाः प्रमया राजीनामा हे माग याना वयाच्वंगु खः । सदनय् विपक्षीं याःगु हंगामां यानाः म्हिगः नं राष्ट्रिय सभा चले याये मफुत ।
सत्ता गठबन्धनया बैठकं विपक्षीं राजीनामा फ्वनाच्वंगु गलत खः धासें प्रधानमन्त्रीं छुं नं हालतय् राजीनामा मबीगु बरु संसदय् उकियात फेस यायेगु धकाः नं निर्णय याःगु दु । सरकारं मिटरब्याजी विरुद्ध कारवाही याये फइ कथं सदनय् कानून हयेगु तयारी यानाच्वंगु इलय् एमालें थ्व विरोध याःगु लिं उगु कानून हयेके मबीत स्वयाच्वंगु धकाः नं गठबन्धनं निर्णय याःगु दु ।
LEAVE YOUR COMMENTS